У сталіцы Італіі ўсю ноч з 4 на 5 студзеня былі моцныя ліўні, дажджы працягнуліся і 6 студзеня. Службы экстраннай дапамогі выязджаюць на сотні выклікаў па ўсім горадзе з-за паводак, галінак і паваленых дрэў, а таксама заблакаваных з-за гэтага аўтамабілістаў і жыхароў горада. У рабоце транспарту назіраюцца перабоі. Некалькі аўтобусных маршрутаў былі змененыя.

Адзначаецца, што за тры дні выпала колькасць ападкаў, роўная месячнай норме.

У рэгіёне на 6 студзеня быў абвешчаны аранжавы ўзровень небяспекі. З-за неспрыяльных умоў надвор’я мэр Рыма Раберта Гуальцьеры падпісаў пастанову аб адмене ўсіх запланаваных у горадзе забаўляльных або спартыўных мерапрыемстваў у грамадскіх месцах. 

Увечары 4 студзеня ў гістарычным цэнтры, недалёка ад Калізея, упала вялізная хвоя. Дрэва павалілася на вуліцы Віа Дэй Форы Імперыялі (Via dei Fori Imperiali) і, як адзначае выданне, па чыстай выпадковасці не закранула ні людзей, ні транспартныя сродкі. 

Дэпартамент грамадзянскай абароны распарадзіўся закрыць доступ да берагоў ракі Тыбр у гарадской мяжы, выказваючы занепакоенасць з прычыны ўзроўню вады ў ёй. Гэта мера будзе дзейнічаць да далейшага паведамлення. 

Неспрыяльныя ўмовы надвор’я нанеслі шкоду чыгуначнай сетцы. На лініі Рым — Велетры/Альбана/Фраскаці рух цягнікоў быў прыпынены з-за затаплення чыгуначных пуцей паблізу Чампіна.