Дзмітрый Крутой звярнуў увагу, што цяпер асобным прадпрыемствам Шклоўскага раёна «трэба істотна падцягнуць эканамічныя паказчыкі». Ад іх патрэбна высокая эфектыўнасць, такое патрабаванне вылучаў кіраўнік дзяржавы падчас цяперашняй рабочай паездкі ў рэгіён. 

«У перспектыве двух-трох гадоў — зніжэнне ўзроўню датацыйнасці раёна. У Шклове ён за апошнія 5 гадоў знаходзіцца на ўзроўні 40%. Для раёна, якому надаецца такая павышаная ўвага, гэта вельмі шмат. Таму эканоміка Шклоўскага раёна павінна пачынаць генерыць узровень даходаў і падаткаў, дастатковы для бездэфіцытнага існавання», — падкрэсліў кіраўнік Адміністрацыі Прэзідэнта.

Паводле яго слоў, кожная галіна раёна ў апошнія гады атрымала вялікую ўвагу з боку дзяржавы і асабіста Прэзідэнта. Гэтая падтрымка выяўлялася і ў грошах, і ў арганізацыйна-кіраўнічых рашэннях, і ў задзейнічанні раёна ў рэспубліканскіх ініцыятывах, напрыклад па выкарыстанні электробусаў у пасажырскіх транспартных зносінах, пашырэнні прысутнасці буйных гандлёвых сетак у рэгіёнах і невялікіх населеных пунктах. 

"Градус утрыманства, пра які казаў у апошнія дні наш лідар, будзе зніжацца. І дапамагаць будуць толькі тым прадпрыемствам, інвестпраектам, арганізацыям, ад якіх чакаецца хуткая аддача. Простага ўкідвання грошай у раённыя ініцыятывы не будзе. Пажадана, каб Шклоў (маецца на ўвазе Шклоўскі раён у цэлым. — Заўв. БелТА) да 2030 года, у рамках бягучай пяцігодкі, выйшаў на бездатацыйны ўзровень, — працягнуў ён.