У правінцыі Лаакай у рамках візіту ў Сацыялістычную Рэспубліку В’етнам Старшыні Палаты прадстаўнікоў Ігара Сергяенкі адбылася цырымонія перадачы в’етнамскай кампаніі самазвалаў БЕЛАЗ, а таксама падпісанне дагавораў паміж ААТ «Белшына» і кампаніяй «Аўтамабільная індустрыя» на адгрузку 500 т натуральнага каўчуку і кантракт на пастаўку 2 кантэйнераў шын для аўтасамаскідаў БЕЛАЗ, паведамляе БелТА.
Удзел у цырымоніі прынялі Старшыня Палаты прадстаўнікоў Ігар Сергяенка, кіраўніцтва правінцыі Лаакай, а таксама прадстаўнікі беларускіх і в’етнамскіх кампаній.
Перадача партыі кар’ерных самазвалаў БЕЛАЗ — падзея, якая мае асаблівае значэнне ў развіцці гандлёва-эканамічных адносін нашых краін. БЕЛАЗ — брэнд, які ўжо многія гады сімвалізуе моц і сучасныя дасягненні беларускіх машынабудаўнікоў. Прадукцыя айчыннага флагмана спалучае ў сабе перадавыя тэхналогіі, высокую прадукцыйнасць і эканамічнасць ў эксплуатацыі.
«Мы гатовыя працягваць дзяліцца сваімі перадавымі інжынернымі тэхналогіямі, праводзіць сумесныя даследаванні і навучанне персаналу, забяспечваць сэрвіснае абслугоўванне для таго, каб эксплуатацыя самазвалаў была максімальна эфектыўнай, — сказаў Ігар Сергяенка. — Глыбокая кааперацыя ў сыравінных і тэхналагічных ланцужках здольная знізіць выдаткі і павысіць агульны эканамічны патэнцыял нашых краін».
