Тактыка-спецыяльныя вучэнні прайшлі ў Бераставіцкім раёне на базе аграфірмы «Стары палац». Ратавальнікі і работнікі гаспадаркі на практыцы адпрацавалі алгарытмы ўзаемадзеяння на выпадак рэальнага здарэння. Сцэнарый быў няпростым: паводле легенды, падчас зварачных работ на збожжасушыльным комплексе адбыўся выбух пылапаветранай сумесі, з-за чаго пачаўся пажар і абрынулася частка сцяны. У небяспечнай зоне засталіся двое рабочых. 

Персанал гаспадаркі спрацаваў па інструкцыі: аператыўна выклікаў МНС і хуткую дапамогу, абясточыў аб’ект і прыступіў да правядзення эвакуацыі. Да прыезду падраздзяленняў Бераставіцкага райаддзела МНС да тушэння прыступіла пажарная дружына прадпрыемства. 

Ратавальнікі правялі разведку, выявілі «пацярпелых» і перадалі іх медыкам, пасля чаго ліквідавалі ўзгаранне. 
«Бяспека буйных вытворчых аб’ектаў напрамую залежыць ад таго, наколькі выразна выбудавана ўзаемадзеянне паміж персаналам і экстраннымі службамі. На гэтых вучэннях мы адпрацавалі алгарытм дзеянняў, дзе кожны ведае сваю задачу. Галоўная мэта — каб у рэальнай сітуацыі ўсе спрацавалі, як адзіны механізм», — падкрэсліў начальнік раённага аддзела па надзвычайных сітуацыях Аляксандр Шляхотка.