З пачаткам восені ў Беларусі чакаецца шэраг важных змяненняў, якія закрануць кожнага з нас. Будзе праведзены пераразлік пенсій, у бюджэтнікаў вырастуць заробкі, пачнецца сезон сельскагаспадарчых кірмашоў з прывабнымі цэнамі і шырокім асартыментам прадукцыі. Акрамя таго, уступаюць у дзеянне змяненні ў Правілы дарожнага руху, вырастуць тарыфы на праезд па платных дарогах. Таксама на шэсць месяцаў уводзіцца ліцэнзаванне вывазу яблыкаў. Мы высветлілі падрабязнасці таго, як усё гэта будзе адбывацца.
Прыемная навіна для 2,3 мільёна пенсіянераў...
Пераразлік працоўных пенсій і іх павышэнне адбудзецца з 1 верасня ў сярэднім на 5 %. Гэта прадугледжана ўказам, які падпісаў Прэзідэнт Беларусі Аляксандр Лукашэнка, паведамілі ў прэс-службе кіраўніка дзяржавы.
З 1 верасня павышаюцца ўсе віды працоўных пенсій (па ўзросце, за выслугу гадоў, па інваліднасці, з нагоды страты карміцеля). У Мінпрацы звярнулі ўвагу, што гэта другое павышэнне сёлета. Першае адбылося з 1 лютага на 10 %.
Паводле папярэдняй ацэнцы, сярэдні памер пенсіі па ўзросце ў верасні складзе Br980. Гадавое павелічэнне (у параўнанні з такім жа часам летась) складзе Br167, ці 20,5 %. Прыбаўка ў кожнага пенсіянера будзе свая — у залежнасці ад працягласці стажу і велічыні заробку, улічаных пры вылічэнні пенсіі, устаноўленых даплат.
У цэлым у верасні расходы на выплату пенсій складуць каля Br2,2 млрд, з іх на павышэнне пенсій будзе накіравана Br107 млн. Атрымальнікамі працоўных пенсій з’яўляюцца больш за 2,3 млн пенсіянераў.
... І для 800 тысяч работнікаў бюджэтнай сферы
З 1 верасня памер базавай стаўкі для аплаты працы ў бюджэтнай сферы складзе Br273, паведамілі ў прэс-службе ўрада. Адпаведную пастанову падпісаў Прэм’ер-міністр Беларусі Аляксандр Турчын.
У Міністэрстве працы і сацабароны дадалі, што гэта ўжо другое павышэнне базавай стаўкі. З 1 студзеня яна была павялічана на 6,7 % — з Br253 да Br270. Сёлета ў параўнанні з мінулым годам сярэднегадавы памер базавай стаўкі павялічыцца на 8 %. Прымаюцца меры па павелічэнні памераў стымуляцыйных выплат асобным катэгорыям работнікаў усіх галін сацыяльнай сферы. Павышэнне базавай стаўкі з верасня закране больш як 800 тысяч работнікаў бюджэтнай сферы. У выніку прынятых мер іх сярэднямесячная заработная плата за першае паўгоддзе павялічылася ў параўнанні з адпаведным перыядам летась на 18,8 % і склала Br2010,8. Рэальная ж заработная плата ўзрасла з тэмпам 111,8 %.
У цэлым на аплату працы работнікаў бюджэтнай сферы сёлета плануецца накіраваць каля Br20,7 млрд, у тым ліку на дадатковыя стымуляцыйныя выплаты асобным катэгорыям работнікаў — каля Br2,69 млрд.
Час кірмашоў
Пачынаецца сезон сельскагаспадарчых кірмашоў. У прыватнасці, у сталіцы ён стартуе 20 верасня. Аб гэтым у эфіры на «Радыё-Мінск» паведаміла начальнік галоўнага ўпраўлення гандлю і паслуг Мінгарвыканкама Алена Нагорная. «Ужо актыўна прыцягваем усе вобласці, каб і фермеры, і вытворцы, і прадпрыемствы Белкаапсаюза маглі прыехаць на зручную для іх пляцоўку», — адзначыла спецыяліст.
На кірмашах прадставяць прадукцыю больш як 50 сельскагаспадарчых прадпрыемстваў з усёй Беларусі. У асартыменце — бульба, цыбуля, морква, капуста, буракі, мясныя вырабы і сала, хатнія нарыхтоўкі, саленні, варэнні, мёд і прадукты пчалярства, кветкі, расада і саджанцы, а таксама прадукцыя фермерскіх гаспадарак: малочныя прадукты, каўбасы, вяндліна. Для пажылых людзей, інвалідаў і іншых маламабільных катэгорый грамадзян будзе арганізавана дапамога ў дастаўцы тавараў.
Яблыкі пад кантролем
Беларусь з 1 верасня на шэсць месяцаў уводзіць ліцэнзаванне вывазу яблыкаў. Пра гэта паведамілі ў прэс-службе ўрада. Адпаведную пастанову падпісаў Прэм’ер-міністр. Вываз гэтай прадукцыі незалежна ад краіны яе паходжання за межы рэспублікі будзе ажыццяўляцца па разавых ліцэнзіях, якія выдаюцца Міністэрствам антыманапольнага рэгулявання і гандлю па ўзгадненні з Мінсельгасхарчам, аблвыканкамамі і Мінскім гарвыканкамам.
Рашэнне аб магчымасці выдачы такой ліцэнзіі будзе прымацца ўпаўнаважанымі органамі, зыходзячы з ацэнкі суадносін свабодных рэсурсаў гэтай прадукцыі ў Беларусі і патрэбнасці краіны ў ёй на момант узгаднення ліцэнзіі. Пастанова прынята ў мэтах забеспячэння ў поўным аб’ёме ўнутранага рынку яблыкамі ў міжсезонны перыяд.
Пра самакатчыкаў і таніроўку
З пачаткам восені ўступаюць у дзеянне асноўныя нормы Указа № 295, які прадугледжвае пэўныя змяненні ў Правілах дарожнага руху. Так, з 1 верасня веласіпедысты і самакатчыкі будуць абавязаны спешвацца падчас перасячэння праезнай часткі дарогі. Хуткасць руху на электрасамакатах, сегвеях і манаколах абмяжуюць (да 25 км/г па веладарожцы і да 10 км/г па тратуары), а прыладам з масай больш за 35 кг забароняць рух па тратуары. Пры гэтым пад сродкамі персанальнай мабільнасці будзе разумецца транспарт з электрарухавіком, які развівае хуткасць не больш за 25 км/г.
Уладальнікі электратранспарту, які па тэхнічных характарыстыках можна аднесці да мапедаў і матацыклаў, атрымаюць права ўдзельнічаць у дарожным руху. Для гэтага трэба пацвердзіць яго тып, аформіць электронны пашпарт і зарэгістраваць у ДАІ.
Пасля 1 верасня не ўзнікне праблем з праходжаннем тэхагляду аўтамабіляў, якія маюць таніроўку на шкле. Пра гэта паведамляецца ў каментарыі Мінтранса, МУС і Дзяржаўнага камітэта па стандартызацыі. Адзначаецца, што наяўнасць жалюзі, шторак або плёначных пакрыццяў на заднім і бакавым шкле транспартных сродкаў не супярэчыць патрабаванням тэхнічнага рэгламенту, бо агляд з вадзіцельскага месца не абмяжоўваецца.
Расцэнкі на платных дарогах
Тарыфы на праезд па платных дарогах вырастуць у Беларусі з 1 верасня. Гэта прадугледжана пастановай Міністэрства транспарту і камунікацый. Для транспартных сродкаў з дапушчальнай агульнай масай больш за 3,5 тоны, якія маюць дзве восі, тарыф складзе 0,117 еўра/км, для транспартных сродкаў з дапушчальнай агульнай масай больш за 3,5 т, якія маюць тры восі, — 0,146 еўра/км, для транспартных сродкаў з дапушчальнай агульнай масай больш за 3,5 т, якія маюць чатыры восі і больш, — 0,176 еўра/км.
Разам з тарыфамі на аплату праезду за кіламетраж мяняецца і кошт электронных віньетак. Віньетка тэрмінам дзеяння на 15 дзён захоўвае кошт 20 еўра. Аднак на 30 дзён падаражэла да 32 еўра, на каляндарны год — да 110 еўра.
