Раней судзімая пенсіянерка з Мінска за грошы дапамагала выхадцам з Паўднёвай Азіі і Паўночнай Афрыкі нелегальна знаходзіцца ў Беларусі, здаючы замежнікам жыллё ў чатырохпакаёвай кватэры. Толькі за два месяцы праваахоўнікі зафіксавалі 70 «кліентаў» мінчанкі з 10 краін. Усяго праз яе кватэру прайшлі сотні замежнікаў. Пры гэтым жанчына ведала, што ў іх не было візы або іншых дакументаў для законнага знаходжання ў Беларусі.

Следчыя распачалі крымінальную справу па факце арганізацыі незаконнай міграцыі. Жанчына змешчана ў ізалятар часовага ўтрымання. Частка яе «кватарантаў» ужо дэпартаваная, астатнія затрыманыя для дачы паказанняў сведак, пасля чаго таксама будуць выправаджаныя за межы краіны.

«У адпаведнасці з Законам „Аб прававым становішчы замежных грамадзян і асоб без грамадзянства ў Рэспубліцы Беларусь“ кватэраздатчыку неабходна на працягу трох гадзін пасля прадастаўлення жылога памяшкання для замежнікаў паведаміць пра гэта ў органы ўнутраных спраў па месцы знаходжання», — нагадалі ў МУС.