Пасля перагавораў у Савеце Рэспублікі і падпісання Мемарандума аб узаемаразуменні парламенцкая дэлегацыя на чале са старшынёй Сената Парламента Ісламскай Рэспублікі Пакістан Саідам Юсуфам Разой Гілані накіравалася ў Дом урада. Тут адбыліся перагаворы з намеснікам Прэм’ер-міністра Віктарам Каранкевічам, падчас якіх бакі абмеркавалі канкрэтныя крокі развіцця далейшага супрацоўніцтва.
Звяртаючыся да кіраўніка парламенцкай дэлегацыі, намеснік Прэм’ер-міністра Віктар Каранкевіч падкрэсліў, што гэты візіт працягвае добрую традыцыю актыўнага палітычнага дыялогу на найвышэйшым і высокім узроўнях паміж Рэспублікай Беларусь і Ісламскай Рэспублікай Пакістан, якая склалася ў апошнія гады. «Кіраўнікі нашых дзяржаў, урадаў, парламентаў і міністэрстваў рэгулярна сустракаюцца, праводзяць пасяджэнні Міжурадавай камісіі па гандлёва-эканамічным супрацоўніцтве. Так і павінна быць паміж сапраўднымі сябрамі», — выказаў упэўненасць ён.
Выключна важныя канструктыўная падтрымка, прыцягненне палітычнай мудрасці і вопыту парламентаў для актывізацыі нашых сувязяў у інтарэсах пакістанскага і беларускага народаў, працягнуў віцэ-прэм’ер. Віктар Каранкевіч адзначыў, што ў свой час у статусе сустаршыні двухбаковай міжурадавай камісіі асабіста ўдзельнічаў у прасоўванні сумесных праектаў з Пакістанам. «І сёння ваша краіна для ўсіх нас з’яўляецца вельмі блізкай», — акцэнтаваў увагу намеснік Прэм’ер-міністра.
Віктар Каранкевіч заўважыў, што стаіць задача выкарыстоўваць рэгулярныя палітычныя і міжведамасныя кантакты для вырашэння розных пытанняў, развіцця двухбаковых адносін і павелічэння гандлёва-эканамічнага супрацоўніцтва. «Сёння адбыліся адкрытыя, даверныя, цёплыя сустрэчы на ўзроўні кіраўніка дзяржавы Аляксандра Рыгоравіча Лукашэнкі і Старшыні Савета Рэспублікі Наталлі Іванаўны Качанавай. Упэўнены, што гэтыя сустрэчы нададуць дадатковы магутны імпульс двухбаковаму ўзаемавыгаднаму супрацоўніцтву паміж нашымі краінамі. Мы адкрытыя для дыялогу і прадметнага абмеркавання любых прыярытэтных кірункаў узаемадзеяння. Упэўнены, што мы знойдзем дадатковыя крокі для дасягнення практычных вынікаў на аснове дамоўленасцяў на найвышэйшым і высокім узроўнях», — адзначыў віцэ-прэм’ер.
У сваю чаргу старшыня Сената Парламента Ісламскай Рэспублікі Пакістан Саід Юсуф Раза Гілані адзначыў: «Прэзідэнт Беларусі сёння таксама сказаў, што нам трэба рухацца наперад, увасабляць у жыццё пагадненні, якія мы падпісалі ў эканамічнай, гандлёвай і іншых сферах. У нас вельмі цесныя і блізкія адносіны з Беларуссю, мы ганарымся нашым сяброўствам».
