На галоўным старце сезона Маскевіч заваяваў залаты медаль у вазе да 97 кілаграм, а Глінчук стаў бронзавым прызёрам у катэгорыі да 130 кг. У Нацыянальным аэрапорце «Мінск» барцоў сустрэлі родныя і блізкія, калегі, прадстаўнікі Беларускай федэрацыі барацьбы і Рэспубліканскага цэнтра алімпійскай падрыхтоўкі «Стайкі».

«Да канца яшчэ не ўсвядоміў, што падняўся на вышэйшую прыступку п’едэстала. Мне 28 гадоў, а я ўжо ўзяў другі па значнасці медаль. Мы засумавалі па гімне і па сцягу. Не атрымалася б адчуць поўны смак перамогі, калі б не было сімволікі, — адзначыў Маскевіч. — Гэты вынік — наша агульная перамога. Задаволены тым, што захоўваў кантроль над фінальнай схваткай. Усё пайшло згодна з маім планам, перажыванняў не было».

«З сапернікам за бронзавую ўзнагароду я змагаўся ўжо некалькі разоў. Паядынак атрымаўся дастаткова цяжкім, мне ўдалося рэалізаваць свае прыёмы. У год беларускай жанчыны я хацеў бы прысвяціць гэту перамогу сваёй маме, — сказаў Глінчук. — Паміж маёй схваткай за трэцяе месца і фіналам Кірыла прайшло каля паўгадзіны, я нават не паспеў парадавацца за сябе, як тут жа перамог ён. Таму за Кірыла я перажыў нават больш эмоцый».

Пасля завяршэння турніраў у грэка-рымскай і жаночай барацьбе ў скарбонцы беларускай каманды чатыры медалі планетарнага форуму ў Астане (1-0-3). 29 кастрычніка на чэмпіянаце свету стартавалі прадстаўнікі вольнага стылю, якія будуць спаборнічаць па 1 лістапада.Ф