Старшыня Савета Рэспублікі адзначыла, што выступленне кіраўніка дзяржавы было выбудавана па-іншаму, калі Аляксандр Лукашэнка гаварыў перш за ўсё аб эканоміцы. «Таму што, вядома, эканоміка — гэта аснова ўсяму. І тут ён дакладна расставіў прыярытэты. Яшчэ раз такі пасыл кожнаму чалавеку. Кожны павінен рабіць на сваім месцы тое, што ён павінен. Шчыра, прыстойна, а самае галоўнае — адказна», — сказала Наталля Качанава. 

Яна падкрэсліла, што моцная эканоміка — гэта не толькі рэалізацыя ўсіх сацыяльных праграм і задач, якія стаяць перад нашай сацыяльна арыентаванай дзяржавай, але гэта яшчэ і магчымасць захаваць суверэнітэт і незалежнасць краіны. «Калі Прэзідэнт гаварыў аб прамысловасці, сельскай гаспадарцы, транспартным забеспячэнні, развіцці моцных рэгіёнаў, ён ставіў абсалютна зразумелыя задачы. Разам з гэтым былі дакладныя пасылы, якія датычацца кожнага чалавека. Гэта і сістэма аховы здароўя, і адукацыя, і культура, і спорт. Казалі і аб тых праблемах, якія ёсць. Усе заўважылі, што ўсе праблемы ляжаць у плоскасці чалавечага фактара. Ніхто не гаворыць сёння пра недахоп фінансавых сродкаў — фінансавання сацыяльнай сферы. Зусім нядаўна мы зацвердзілі бюджэт на 2026 год і бачым, што ён зноў ідзе з прыростам па сацыяльных артыкулах. Але калі на месцах не вельмі ўважліва паставіліся ці няправільна арганізавалі працу, чалавек, напрыклад, не можа ўзяць талон да ўрача ці патрапіць да вузкага спецыяліста. Тут ужо ўзнікаюць пытанні ў арганізацыі аказання медыцынскай дапамогі ў канкрэтным рэгіёне ці ў асобна ўзятым раёне. І мы гэта ведаем і бачым», — адзначыла Старшыня Савета Рэспублікі.

Гаворачы аб перспектывах, Наталля Качанава канстатавала, што Усебеларускі народны сход — гэта вырашэнне стратэгічных пытанняў. «Мы падводзім вынікі праграмы сацыяльна-эканамічнага развіцця, абмяркоўваем яе на наступнае пяцігоддзе. У ёй дакладна вызначаны прыярытэты і напрамкі развіцця дзяржавы. Перш за ўсё гэта, вядома, нацыянальная дэмаграфічная бяспека, падтрымка сем’яў, сямейныя каштоўнасці, здароўе нашага народа, гэта адукацыя, акцэнт зроблены перш за ўсё на прафесійную падрыхтоўку. Па кожным прыярытэтным напрамку ёсць індыкатары, дзяржаўныя праграмы, якія зацверджаны, і рэалізацыя іх будзе знаходзіцца на строгім кантролі. Мы гаворым аб камфортным асяроддзі пражывання, а гэта будаўніцтва жылля, у тым ліку арэнднага, гэта і дарогі, што немалаважна. Шмат паступае зваротаў наконт гэтага, шмат ужо зроблена, але разам з тым 25 тыс. км дарог будзе адрамантавана, рэканструявана, пабудавана новых за наступнае пяцігоддзе. Канешне, вельмі важная бяспека нашай краіны. На Усебеларускім народным сходзе прынята Канцэпцыя нацыянальнай бяспекі, Ваенная дактрына, але для таго, каб гарантаваць бяспеку нашай краіны, на гэта павінна працаваць і прамысловасць, напрыклад, выпускаць усе сродкі, якія выкарыстоўваюць сілавыя структуры, каб абараніць нашу краіну. Аляксандр Лукашэнка заўсёды гаварыў аб тым, што мы міралюбівая краіна, і ён той Прэзідэнт, які заўсёды будзе падтрымліваць вырашэнне ўсіх канфліктаў толькі дыялогам, толькі мірным шляхам. Але абараняць сваю краіну трэба», — праінфармавала Наталля Качанава. 

Таксама сярод ключавых напрамкаў — турызм. «Для нашай краіны гэта вельмі актуальна. Мы тая краіна, куды прыязджаюць, якой захапляюцца, якую любяць. Размова і аб санаторна-курортным лячэнні, аб медыцынскім турызме, гістарычным турызме. Бо ў нас ёсць выдатныя гарады, дзе захаваліся гістарычныя каштоўнасці, якімі мы ганарымся. Акрамя таго, мы абмяркоўваем яшчэ адзін вельмі важны прыярытэтны напрамак, які захаваўся з гэтай пяцігодкі, — гэта моцныя рэгіёны. Працягваючы выконваць даручэнні кіраўніка дзяржавы, мы разумеем, што за моцнымі рэгіёнамі стаіць моцная краіна. У нас цудоўная краіна, і трэба стварыць усе ўмовы для таго, каб усім людзям усюды жылося камфортна. Для гэтага трэба рабіць так, каб у людзей найперш была праца. А для гэтага ў нас рэалізоўваўся праект „Адзін раён — адзін праект“. Аляксандр Лукашэнка сказаў аб тым, што мы прадоўжым работу ў гэтым напрамку, а значыць — будуць стварацца працоўныя месцы. Для гэтага прынята шмат рашэнняў на ўзроўні кіраўніка дзяржавы па будаўніцтве жылля ў населеных пунктах з колькасцю насельніцтва 20 тыс. чалавек і менш. Таксама неабходна ствараць сацыяльную інфраструктуру і ўсё тое, што трэба кожнаму чалавеку для нармальнага жыцця», — падкрэсліла Наталля Качанава.