Па даручэнні кіраўніка дзяржавы агракамбінат «Ждановічы» стварае сучасны комплекс энергазберагальных цяпліц, які стане важным аб’ектам харчовай бяспекі краіны. 

Амбіцыйны праект уключае будаўніцтва дзвюх вялікіх цяпліц. Працаваць яны будуць круглы год незалежна ад капрызаў надвор’я дзякуючы штучнаму асвятленню раслін для папаўнення недахопу сонечнага святла.

Старшыня Мінскага аблвыканкама Аляксей Кушнарэнка сёння правёў сустрэчу з прадстаўнікамі падрадных арганізацый, якія далажылі аб ходзе работ. 

А яны прасоўваюцца па ўсіх франтах. Паспяхова завершаны ключавыя этапы па газіфікацыі: абсталяванне здадзена, усе заўвагі наглядных органаў ліквідаваны, хутка будзе атрыманы акт гатоўнасці. На пляцоўцы поўным ходам ідуць электрамантажныя работы — пракладзены кабельныя лініі, зманціраваныя падстанцыі. 

Аляксей Кушнарэнка цікавіўся не толькі тэхнікай, але і людзьмі: ці хапае рабочых рук і як ідуць справы з заробкамі. Кіраўнік прадпрыемства запэўніў, што кадравага дэфіцыту няма, а сярэдні заробак работнікаў цяпліц летась склаў каля 3 тысяч рублёў. 

Падводзячы вынікі, старшыня аблвыканкама расставіў дакладныя часавыя рамкі, у якія павінны ўкласціся будаўнікі. Першыя таматы тут плануюць атрымаць ужо да лістапада бягучага года.

Яна ВАЛАСАЧ