Краіны СНД не дапусцяць перагляду гістарычных вынікаў Вялікай Айчыннай вайны, заявіў журналістам першы намеснік генеральнага сакратара СНД Ігар Петрышэнка, перадае БелТА.

«У кожнай дзяржаве СНД вельмі вялікая ўвага надаецца ветэранам і, вядома ж, захаванню памяці аб гэтым вялікім подзвігу. І мы працягваем гэтую работу для таго, каб захаваць гэтую вялікую памяць і перадаць будучым пакаленням», — сказаў Ігар Петрышэнка.

«Літаральна на мінулым тыдні адбылося пасяджэнне Міжпарламенцкай Асамблеі СНД, дзе парламентарыі нашых краін яшчэ раз пацвердзілі, што трэба разам дзейнічаць для таго, каб не дапусціць перагляду гістарычных вынікаў Вялікай Айчыннай вайны», — адзначыў першы намеснік генеральнага сакратара.

Пасяджэнне Савета пастаянных паўнамоцных прадстаўнікоў дзяржаў-удзельніц Садружнасці пры статутных і іншых органах Садружнасці праходзіць у Выканаўчым камітэце СНД у Мінску. На сустрэчы пастаянныя прадстаўнікі разгледзяць праект прэс-рэлізу з нагоды 80-й гадавіны Перамогі ў Вялікай Айчыннай вайне 1941-1945 гг.