Расійскі пісьменнік-баталіст Мікалай Андрэевіч Чаркашын — добра вядомы і ў Беларусі творца. Яго кнігі пра ваенную гісторыю, драматычныя падзеі Вялікай Айчыннай вайны пастаянна прыстунічаюць на паліцах кнігарняў ААТ «Белкніга». Не аднойчы член Саюза пісьменнікаў Расіі і член Саюза пісьменнікаў Беларусі М. Чаркашын прэзентаваў свае навінкі, выдадзеныя ў тым ліку і ў Беларусі, у мінскай кнігарні «Светач». Творы М. Чаркашына выходзяць і ў Выдавецкім доме «Звязда», выдавецтвах «Чатыры чвэрці» і «Беларусь».
Днямі празаік і публіцыст наведаўся ў Баранавіцкую цэнтральную гарадскую бібліятэку імя В. П. Таўлая. Расказвае дырэктар кніжніцы Таццяна Аляксандраўна Рудкоўская: «Нам прыемна было пазнаёміцца, лічы, з нашым земляком. Мікалай Андрэевіч нарадзіўся ў Ваўкавыску, на Гродзеншчыне, у сям’і вайскоўца-франтавіка. Падлеткам жыў у Баранавічах. Добра памятае наш горад і яго ваколіцы ў пасляваеннны час. Толькі сёлета ў Мінску былі выдадзены кнігі расійскага і беларускага пісьменніка „Брестские врата“, „Заговоренные“, „Нелегал из Кенигсберга“. Усе яны ёсць на паліцах нашай цэнтральнай бібліятэкі і ў бібліятэках-філіялах горада. Мы дамовіліся, што Мікалай Андрэевіч яшчэ сёлета наведаецца ў Баранавічы, і выступіць перад маладзёжнай аўдыторыяй — студэнтамі і школьнікамі горада...»
Мікалай Чаркашын добра ведае многія грамадскія і дзяржаўныя краязнаўчыя музеі Баранавіч, увогуле Брэсцкай вобласці, знаёмы з пошукавікамі, краязнаўцамі, архівістамі края, нераўнадушнымі даследчыкамі ваеннай памяці. Вось і зараз пісьменнік расшукваў новыя сюжэты, цікавіўся лёсам знойдзенага Баявога сцяга 144-га кавалерыйскага палка 36-й дывізіі.
Магчыма, новыя фрагменты падзей 1941 года на Берасцейшчыне таксама ўвойдуць у новыя раманы і аповесці Мікалая Чаркашына.
Мікола Берлеж
Баранавічы
Выдавецкі дом «Звязда»
ААТ «Белкніга»
Саюз пісьменнікаў Беларусі
Таццяна Рудкоўская
Мікалай Чаркашын
Баранавіцкая цэнтральная гарадская бібліятэка імя В. П. Таўлая
