Міністр канстатаваў, што ў ВНУ скончыўся прыём дакументаў, і праходзяць унутраныя ўступныя іспыты для абітурыентаў па напрамках «мастацтва» і «фізічная культура», а таксама для выпускнікоў каледжаў, якія жадаюць атрымае вышэйшую адукацыю. «Да 27 ліпеня адбудзецца залічэнне ва ўніверсітэты, таму сёння мы можам ужо бачыць першыя вынікі і тэндэнцыі гэтай уступнай кампаніі. У адрозненне ад мінулага года яна прайшла значна больш актыўна. Аб гэтым сведчаць і конкурсы, і прахадныя балы. У цэлым план прыёму на бюджэтную форму папярэдне будзе выкананы на 99,4%, гэта значыць у нас практычна стопрацэнтная рэзультатыўнасць», — праінфармаваў Андрэй Іванец.

Ён адзначыў, што сёння асаблівая ўвага прыкавана да тых кадраў, якія патрэбны эканоміцы краіны. «Першае — гэта кадры для аграпрамысловага комплексу. Дзве з чатырох ВНУ сельскагаспадарчага профілю ў поўным аб’ёме выканалі лічбы прыёму. У гэтым годзе бюджэтны набор у іх па плане быў каля 2 тыс. чалавек. Тут ёсць нязначны недабор у 80 вакантных месцаў. Пасля 27 ліпеня і залічэння, мы мяркуем, што і сельскагаспадарчая акадэмія ў Горках і Віцебская ветэрынарная акадэмія аб’явяць дадатковы набор. І выпускнікі, якія жадаюць абраць гэтыя прафесіі, змогуць прэтэндаваць на гэтыя месцы. Прывабнасць аграрных спецыяльнасцей у параўнанні з мінулым годам вырасла ў разы, пра гэта сведчыць статыстыка. Другое — сёлета быў рэкордны набор на педагагічныя спецыяльнасці — 3,9 тыс. хлопчыкаў і дзяўчынак паступілі і цяпер залічваюцца. Добрыя конкурсы былі на „дашкольнай адукацыі“, напрыклад, у педагагічным універсітэце — 1,4 чалавека на месца. Запатрабаваны філалагічны напрамак, напрыклад, на беларускую мову і літаратуру конкурс быў каля 1,7 чалавек на месца ў БДПУ, 1,4 чалавека на месца — на перакладчыцкім напрамку ў МДЛУ», — расказаў кіраўнік адукацыйнага ведамства.

Акрамя таго, міністр адзначыў запатрабаванасць інжынерных прафесій. «Рабяты, якія здавалі фізіку і матэматыку, былі накіраваны ў тым ліку на інжынерныя прафесіі. Таму практычна з 4 тыс. месц планавага прыёму на педагагічныя спецыяльнасці ў нас засталося ўсяго толькі 46 месц фізіка-матэматычнага профілю. Гэта звязана найперш з павелічэннем набору будучых настаўнікаў у Беларускі дзяржаўны ўніверсітэт. На кожным профільным факультэце мы набралі па дзве групы будучых настаўнікаў фізікі, матэматыкі, інфарматыкі, біялогіі, хіміі і геаграфіі. У цэлым хацеў бы сказаць, што план прыёму сёлета выкананы практычна на 100%. Мяркуем, што хлопцы будуць задаволены», — падкрэсліў Андрэй Іванец.

У ВНУ краіны падалі дакументы больш як 4 тыс. медалістаў, больш як 1,6 тыс. уладальнікаў чырвоных дыпломаў каледжаў, а таксама каля 250 пераможцаў рэспубліканскіх алімпіяд.