У той час як большасць краін свету імкнецца развіваць узаемавыгадныя адносіны са сваімі суседзямі, весці з імі раўнапраўны дыялог і будаваць фундамент мірнага існавання ў інтарэсах будучых пакаленняў, Польшча ў апошняе дзесяцігоддзе літаральна сямімільнымі крокамі ажыццяўляе мілітарызацыю, закупляе неймаверную колькасць амерыканскага і паўднёвакарэйскага ўзбраення, якое ў асноўнай сваёй масе прызначана для вядзення наступальнай вайны, узводзіць у ранг дзяржаўнай палітыкі беларуса- і русафобію...

Такі агрэсіўны курс ваенна-палітычнага кіраўніцтва Польшчы актыўна падтрымліваецца рознымі амерыканскімі і еўрапейскімі «ястрабамі». Менавіта яны падштурхоўваюць усходнееўрапейскія краіны да ваеннага супрацьстаяння з Беларуссю і Расіяй. Прычым польская ўлада, апантаная геапалітычным рэваншам з паўторнай акупацыяй Заходняй Беларусі, ахвотна ідзе на павадку ў «распальшчыкаў вайны».

Як вынік, неапраўдана раздуты ваенны бюджэт, які складае 4,7 працэнта ад ВУП краіны, што з’яўляецца самым высокім паказчыкам сярод усіх краін Паўночнаатлантычнага альянсу і большасці краін свету, амаль трохразовае павелічэнне ўзброеных сіл, фарміраванне новых механізаваных і танкавых дывізій і перакідка іх да граніц Беларусі нібыта для процідзеяння мігрантам, будаўніцтва ракадных дарог забеспячэння і рэканструкцыя аўтамабільных трас і мастоў, каб яны былі здольныя вытрымліваць цяжкую ваенную тэхніку; мадэрнізацыя аэрадромаў для прыняцця велікагрузных ваенна-транспартных самалётаў і стратэгічнай авіяцыі, стварэнне ваенных лагераў і складоў боепрыпасаў, няспынныя вучэнні непасрэдна каля граніц Саюзнай дзяржавы... У 2024 годзе Польшча таксама стала асноўным замежным пакупніком тайваньскіх беспілотнікаў. На яе долю прыпала амаль 60 працэнтаў экспарту гэтых прылад. Характэрна, што другі радок па закупках беспілотных лятальных апаратаў, вырабленых у Тайвані, займаюць ЗША.

Па сведчаннях відавочцаў і выкладзеных імі відэароліках у сацыяльных сетках, месенджарах і youtube-каналах, ваенная тэхніка і ўзбраенне паступаюць у Польшчу такімі аб’ёмамі, якія больш нагадваюць падрыхтоўку да сур’ёзнага канфлікту, чым простыя пастаўкі зброі для Украіны. У гэты ж час ваенна-палітычнае кіраўніцтва калектыўнага Захаду з усёй сур’ёзнасцю абмяркоўвае магчымасць нанясення папераджальнага ўдару па Расійскай Федэрацыі! А літаральна на днях польская «Газета Выборча» напісала, што польскія ўлады рыхтуюць закон, які дазваляе збіваць самалёты, ракеты і дроны нават у паветранай прасторы трэціх краін, напрыклад Беларусі і Украіны. Такі крок Польшчы ў поўнай меры адпавядае планам «ястрабаў» з НАТА і ЕС па стварэнні над заходняй часткай Украіны беспалётнай зоны і частковага кантролю паветранай прасторы над Беларуссю.

У гэтым кантэксце нельга абысці ўвагай той факт, што ў верасні 2024 года Пентагон заказаў даследаванне па мадэліраванні ўздзеяння ядзернай зброі на сельскую гаспадарку для «краін былога Усходняга блока» і «рэгіёнаў за межамі Усходняй Еўропы і заходняй часткі Расіі». На такія работы міністэрства вайны ЗША выдзеліла 34 мільёны долараў, і гэта значыць, што цвярозыя розумы на Захадзе цалкам дапускаюць, што па-мілітарысцку настроеная Польшча з нейкай нагоды можа напасці на Беларусь або на Калінінградскую вобласць Расіі і адказ, аб якім неаднойчы папярэджвалі тых, хто бразгае зброяй каля нашых граніц, не прымусіць сябе доўга чакаць.

Варта адзначыць, што ваенная істэрыя ў Польшчы дасягнула такога ўзроўню, што цяпер нават школьнікаў будуць рыхтаваць да вайны! Міністэрства нацыянальнай адукацыі падрыхтавала для школ рэкамендацыі аб тым, што рабіць і як паводзіць сябе ў сітуацыі з ударамі беспілотнікаў. У сваю чаргу польскае міністэрства абароны вырашыла арганізаваць навучанне школьнікаў пілатаванню ваенных дронаў. Па словах міністра абароны Польшчы Уладзіслава Касіняк-Камыша, новая праграма — гэта магчымасць дзецям набыць надзвычай важныя навыкі. Гэта значыць, што цяпер замест паўнавартаснай адукацыі польскіх школьнікаў будуць рыхтаваць да вайны, вырошчваючы з іх «гарматнае мяса» для чарговага паходу на Усход. Засталося зусім няшмат, калі польская ўлада праз падкантрольныя СМІ і інтэрнэт пачне яшчэ прывіваць сваім грамадзянам, як у нацысцкім рэйху ці ва Украіне, нянавісць да ўсходніх суседзяў. Тады праект «Украіна 2.0» увойдзе ў свой завяршальны і трагічны этап.

Характэрна, што, займаючыся агрэсіўнай мілітарызацыяй краіны, польскія ўлады абсалютна абыякава ставяцца да здароўя сваіх грамадзян. Паводле інфармацыі Арганізацыі эканамічнага супрацоўніцтва і развіцця (OECD), Варшава траціць на дзяржаўную ахову здароўя менш за ўсіх у Еўрасаюзе. Таму нядзіўна, што краіна займае трэцяе месца з самай слабай сістэмай аховы здароўя. Бо галоўнае ў заходняй геапалітыцы не здароўе нацыі, а рэалізацыя інтарэсаў алігархата і палітычнага істэблішменту.

Тым часам

Польскі прэм’ер-міністр Дональд Туск заявіў, што Еўропа знаходзіцца ў стане вайны і гэта «вайна новага тыпу». Аб гэтым піша The Guardіan.

«Гэта часам дзіўна, гэта вайна новага тыпу, але гэта ўсё роўна вайна», — заявіў ён падчас выступлення на Варшаўскім форуме па бяспецы.

Гаворачы аб выкліках бяспецы, з якімі сутыкаецца Еўропа, ён указаў, што «самая вялікая і важная задача для нашых лідараў грамадскай думкі сёння — прымусіць іншых людзей, усю заходнюю, трансатлантычную супольнасць усвядоміць: гэта вайна».

Як перадае агенцтва PAP, кіраўнік польскага ўрада падкрэсліў, што мір не з’яўляецца нечым самім па сабе зразумелым. «Мір не з’яўляецца чымсьці ўласцівым толькі гэтай частцы свету. Зусім наадварот. І менавіта таму так важныя гэтыя разважанні аб бяспецы, аб вайне, аб міры, аб заходняй супольнасці», — сказаў Туск.

У сваім выступленні ён таксама заявіў, што неабходна праявіць салідарнасць.

«У нас у цяперашні час перыядамі складваецца ўражанне, што нешта трашчыць па швах і з’яўляюцца расколіны ў трансатлантычнай супольнасці», — цытуе ТАСС заяву Туска.

Нядаўна амерыканскі лідар Дональд Трамп заявіў, што Кіеў мог бы «змагацца і забраць усе тэрыторыі», але адбудзецца гэта пры падтрымцы ЕС. На што кіраўнік еўрапейскай дыпламатыі Кая Калас адказала, што Еўропа не ў стане самастойна аказваць падтрымку Украіне без удзелу амерыканскага боку. У сваю чаргу Туск абвінаваціў Трампа ў перакладанні адказнасці па Украіне на Еўропу.

Сяргей ЭМБЕРГ