Top.Mail.Ru

Помнік легендарнаму беларускаму барцу Аляксандру Мядзведзю адкрылі на Усходніх могілках Мінска

На Усходніх могілках сталіцы адбылося ўрачыстае адкрыццё помніка легендарнаму беларускаму барцу Аляксандру Мядзведзю, паведамляе БелТА.


Трохразовы алімпійскі чэмпіён і сяміразовы чэмпіён свету, прызнаны лепшым барцом вольнага стылю ў гісторыі і лепшым спартсменам Беларусі XX стагоддзя пайшоў з жыцця 2 верасня 2024 года ва ўзросце 86 гадоў.


«Аляксандр Мядзведзь — легенда не толькі айчыннага, але і сусветнага спорту. Ужо два гады яго няма з намі, але памяць аб ім будзе жыць заўжды. Ён быў прыкладам для спартсменаў на дыване і настаўнікам у звычайным жыцці, — адзначыў кіраўнік НАК Беларусі Віктар Лукашэнка. — Удзел у стварэнні помніка прыняла ўся спартыўная грамадскасць краіны, і сімвалічна, што мы сабраліся ў дзень нараджэння Аляксандра Васільевіча».

«Сёння вельмі не хапае яго цёплага погляду і ўмення падтрымаць у цяжкую хвіліну, — сказаў старшыня Мінгарвыканкама Уладзімір Кухараў. — Аляксандр Мядзведзь стаў увасабленнем цэлага віду спорту, дзякуючы яму ў барацьбу прыйшло мноства маладых людзей. І сёння турнір яго імя збірае сотні спартоўцаў. Вялікі атлет услаўляў беларускі народ, і захаванне памяці аб ім — наша агульная задача».


На адкрыцці помніка на Усходніх могілках сабраліся прадстаўнікі НАК і Мінспорту, кіраўнікі нацыянальных федэрацый, супрацоўнікі цэнтраў алімпійскай падрыхтоўкі, члены нацыянальнай каманды па барацьбе, а таксама ветэраны спорту, сябры і вучні Аляксандра Васільевіча.

«Ён глядзіць на нас і цешыцца таму, што ўсе блізкія людзі сёння тут. Па-іншаму быць не магло — усё яго вельмі кахалі і паважалі. Аляксандр быў вельмі духоўным і глыбокім чалавекам, заўсёды было цікава проста слухаць яго, — успомніў першы намеснік старшыні Федэрацыі спартыўнай барацьбы Расіі Амар Муртузаліеў. — Перакананы, што сюды будуць прыходзіць новыя пакаленні змагароў, якія працягваюць справу, якой Мядзведзь прысвяціў жыццё. Прайшло ўжо паўстагоддзя, а яго дасягненні ніхто не перасягнуў».

Аўтарам помніка стаў беларускі скульптар Канстанцін Касцючэнка. Манумент уяўляе сабой бронзавы бюст маладога Аляксандра Мядзведзя на гранітнай аснове, ля падножжа блока намаляваны фігуры змагароў.


«На помніку Аляксандр Васільевіч — у барцоўскім трыко, гэта было яго прыжыццёвае пажаданне. Вышыня манумента — каля трох метраў, мы хацелі, каб ён быў бачны здалёк, — распавёў трэнер СДЮШАР па барацьбе імя Аляксандра Мядзведзя Уладзімір Багуцкі. — У бюста максімальнае падабенства: спартовец як жывы, са сваёй іранічнай усмешкай. Праца была доўгая і карпатлівая, але ўсё атрымалася проста цудоўна».

arrow
Нашы выданні

Толькі самае цікавае — па-беларуску!

Напішыце ў рэдакцыю