Па поўначы краіны 12 жніўня месцамі чакаюцца навальніцы, днём у асобных раёнах Беларусі — узмацненне ветру парывамі 15-18 м/с. Магчымыя пашкоджанне (абрыў) ліній сувязі і электраперадачы, парушэнне электразабеспячэння, адключэнне электрычных падстанцый і электраэнергіі ў населеных пунктах. Таксама ўзрастае рызыка ўзнікнення лясных пажараў, а таксама пажараў у жылых і вытворчых будынках. 

Акрамя таго, можа быць пашкоджанне і абвальванне слаба ўмацаваных канструкцый, дахаў будынкаў і збудаванняў, падзенне дрэў.

Пры навальніцы рэкамендавана па магчымасці не выходзіць на вуліцу, зачыніць вокны і коміны, каб пазбегнуць скразняку, не паліць печку, варта трымацца далей ад электраправодкі, антэн, адключыць радыё і тэлевізар, пазбягаць выкарыстання тэлефона і электрапрыбораў.

Калі падчас навальніцы вы на адкрытай мясцовасці, то не варта хавацца пад высокія дрэвы, асабліва адзінкавыя. У лесе варта схавацца сярод нізкарослай расліннасці, калі хаваецца група асоб, то лепш прысесці на кукішкі, не дакранаючыся да іншых людзей.