Абурэнне з прычыны куплі ежы і незвычайнага прадмета посуду ў пункце на пр. Дзяржынскага з’явілася ў сацсетцы на мінулым тыдні.

— Захацелася мне купіць ежу і гэты цудоўны кубачак (як мне здавалася). І не ўсё так салодка выйшла. Настрой агідны, кубачак і грошы ў сметнік, — піша хлопец, звяртаючыся да карыстальнікаў і кампаніі. — З якога часу мы купляем б/к кубачкі? Чаму не вярнуў адразу? Таму што заказ быў навынас — я забраў пакет і памчаўся хутчэй дадому! А там я ўбачыў, што кубкам ужо карысталіся. Што далей? «Биф тейсти ролл» з рэшткаў ежы будзем збіраць?

У каментарыях прадстаўнікі кампаніі напісалі, што звязаліся з аўтарам відэа, аднак, пра што ішла гаворка, застаецца загадкай. Тым не менш Цэнтр гігіены і эпідэміялогіі Маскоўскага раёна праверыў кафэ. Спецыялісты ўстанавілі, што кубачкі-хамелеоны не рэалізуюцца ў рэстаранах хуткага абслугоўвання дадзенай сеткі хуткага харчавання ў якасці асобнага тавару. Хутчэй, яны з’яўляюцца рэкламнай прадукцыяй, якая выдаецца спажыўцам на бязвыплатнай аснове пры ўмове ўдзелу ў акцыях.

— Такія кубачкі захоўваюцца ў вытворчай зоне рэстарана асобна ад харчовай прадукцыі. Кожны змешчаны ў індывідуальны поліэтыленавы пакет, трубачкі і накрыўкі размяшчаюцца ў пакетах партыямі. Пры выдачы тавару работнік рэстарана дастае посуд са скрынкі, пакідаючы яе ў поліэтыленавым пакеце, бярэ трубачку і накрыўку з пакета, ажыццяўляе зборку кубка-хамелеона і выдае тавар. Зборка посуду ажыццяўляецца супрацоўнікамі з выкарыстаннем аднаразовых пальчатак, — расказалі спецыялісты. — Кубачкі-хамелеоны не выкарыстоўваюцца ў якасці посуду для выдачы гатовых напояў. Спажыўцу прадастаўляецца новы кубачак, які не быў раней ва ўжыванні. На вонкавым боку дна посуду размешчаны стыкер са звесткамі аб іх прызначэнні, умовах мыйкі і інш.

У Маk.by расказалі, што работнікі рэстаранаў паўторна праінструктаваныя аб парадку і аб умовах захоўвання, зборкі і выдачы кубкаў-хамелеонаў, неабходнасці праверкі проматавараў перад іх прадастаўленнем спажыўцам.

Між тым крытычная інфармацыя з сеткі будзе ўлічаная пры планаванні наглядных мерапрыемстваў у дачыненні да ўнітарнага прадпрыемства Маk.by, запэўнілі ў санітарнай службе.