Пракуратура Брэста падтрымала дзяржаўнае абвінавачванне ў дачыненні да 53-гадовай жанчыны за ўхіленне ад выплаты падаткаў у буйным памеры. Пра гэта паведамілі ў службе інфармацыі пракуратуры Брэсцкай вобласці, перадае БелТА.
Фігуранткай стала жыхарка аднаго з раённых цэнтраў Брэсцкай вобласці, якая развівала ўласную справу ў сферы грамадскага харчавання. Для ўхілення ад выплаты падаткаў жанчына ўжыла схему драбнення бізнесу.
«У прыватнасці, яна стварыла два ўзаемазвязаныя таварыствы з абмежаванай адказнасцю. Адно з іх прымяняла спрошчаную сістэму падаткаабкладання. Дакладна ведаючы аб памеры выручкі, атрыманай ад дзейнасці суб’ектаў гаспадарання за 2020—2023 гады, маючы намер на ўхіленне ад выплаты падаткаў, абвінавачаная штучна размяркоўвала выручку паміж ТАА, якая фактычна з’яўлялася аднаго з іх. Такім чынам яна неправамерна выкарыстала перавагі спрошчанай сістэмы падаткаабкладання», — растлумачылі ў пракуратуры.
Схаванымі аказаліся падатковая база па падатку на прыбытак, падатку на нерухомасць і ПДВ. Агульная сума ўхілення ад выплаты падаткаў перавысіла 390 тыс. бел. руб. Яе фігурантка кампенсавала.
Суд Ленінскага раёна Брэста прызнаў жанчыну вінаватай паводле ч. 2 арт. 243 КК. Яе прыгаварылі да паўтара года абмежавання волі без накіравання ў папраўчую ўстанову адкрытага тыпу. Прадпрымальніцы трэба заплаціць 500 базавых велічынь штрафу (22,5 тыс. бел. руб.). Таксама на тры гады яе пазбавілі права займаць пасады, звязаныя з выкананнем арганізацыйна-распарадчых і адміністрацыйна-гаспадарчых абавязкаў. Прыгавор не ўступіў у законную сілу. Ён можа быць абскарджаны і апратэставаны ў апеляцыйным парадку.
