Самыя маштабныя работы праходзяць сёння, 18 красавіка. У рэспубліканскі суботнік прадстаўнікі нацыянальнага прафцэнтра, галіновых прафсаюзаў на чале са старшынёй ФПБ Юрыем Сянько працуюць у Барысаўскім раёне. 200 прадстаўнікоў нацыянальнага прафцэнтра, галіновых прафсаюзаў на тэрыторыі 15 га высадзілі больш за 70 тысяч саджанцаў хвоі і елі ў Барысаўскім раёне. Гэта тэрыторыя і заяўленыя работы выбраны не выпадкова: на рэгіён прыпала немалая доля разгулу непагадзі.

— Сёння завяршаецца акцыя па пасадцы лесу. Прафсаюзы Беларусі традыцыйна вельмі актыўна да яе падключыліся і ўжо некалькі выхадных запар працуюць на тых участках, якія вызначаны спецыялістамі Міністэрства лясной гаспадаркі, каб высадзіць дрэвы пасля анамалій прыроды. Акрамя таго, у рэспубліканскі суботнік нашы актывісты ўдзельнічаюць на ўсіх пляцоўках па навядзенні парадку — у парках, у гарадах, на вуліцах, на сваіх працоўных месцах. Гэта вельмі важная акцыя, і ўпэўнены, уся сённяшняя работа дасць добры вынік для нашай краіны па навядзенні парадку, — адзначыў Юрый Сянько.

Ён падкрэсліў, што прыборка гарадоў, паркаў і вуліц — гэта яшчэ і падрыхтоўка да свята 1 мая.

— У першыя вясновыя дні, калі становіцца магчымым, мы прыбіраем старое лісце ў парках і рыхтуем іх да традыцыйных першамайскіх мерапрыемстваў, прысвечаных чалавеку працы. З вялікім задавальненнем рыхтуемся да яго і перакананыя, што для нашых людзей, для нашых працоўных, для сацыяльных партнёраў гэта будзе добрае свята, — дадаў старшыня ФПБ.

Што датычыцца высадкі лесу, то сёлета гэта ўжо не першае мерапрыемства. З моманту аб’яўлення рэспубліканскай акцыі «Лес! Дабро! Парадак!» прафсаюзы Беларусі сістэмна працавалі па аднаўленні лясоў і добраўпарадкаванні прыродных тэрыторый, якія пацярпелі ў выніку неспрыяльных умоў надвор’я.

Практычна кожныя выхадныя і ў вольны ад работы час прафсаюзныя актывісты працавалі па ўсёй краіне. Толькі з сярэдзіны сакавіка ў акцыі прынялі ўдзел амаль 8 тысяч чалавек. Агульнымі намаганнямі высаджана каля 849,5 гектараў лесу — гэта значны ўклад у падтрыманне экалагічнага балансу і захаванне прыроднай спадчыны. Акрамя таго, сёлета асаблівы акцэнт зроблены і на добраўпарадкаванні тэрыторый, разборы завалаў і смецця пасля зімы і ўмоў надвор’я. Як ужо адзначалі ў галіновым ведамстве, за мінулы год дзякуючы агульным намаганням многія тэрыторыі, якія пацярпелі ў выніку стыхій, ужо адноўлены. Таму зараз вельмі актуальная дапамога менавіта ў добраўпарадкаванні і навядзенні парадку ў лясных масівах.

Таксама падчас суботніка вялікая ўвага прафсаюзамі нададзена далейшаму добраўпарадкаванню памятных мясцін. Напрыклад, прафсаюзная моладзь працуе на такіх аб’ектах як помнік Герою Савецкага Саюза Джумашу Асаналіеву ў сталіцы, мемарыяльныя комплексы «Трасцянец», «Папова Града», «Доры» і інш.

Не засталіся без увагі і падшэфныя арганізацыі, у прыватнасці, сельскагаспадарчага профілю. Акрамя таго, прадстаўнікі прафсаюзных арганізацый розных галін па ўсёй краіне працуюць на аб’ектах адпачынку і аздараўлення грамадзян, у сацыяльных установах, дзіцячых спартыўных школах і гарадскіх парках.

Алена КРАВЕЦ