Праект па запуску хуткаснай электрычкі з Мінска ў аэрапорт з прыпынкам на тэрыторыі Кітайска-беларускага індустрыяльнага парку «Вялікі камень» будзе рэалізаваны ў 2028-2029 гадах. Зараз ідзе фарміраванне крыніц фінансавання. Пра гэта расказаў першы намеснік генеральнага дырэктара кампаніі па развіцці індустрыяльнага парку Кірыл Карацееў, паведамляе БелТА.
Па словах Кірыла Карацеева, кампанія па развіцці парку «ўносіць сваю пасільную лепту ў развіццё праекта, які звяжа Мінск і аэрапорт». Размова аб хуткасных чыгуначных зносінах.
«Мы цяпер будуем побач з аэрапортам вялікі чыгуначны грузавы кантэйнерны тэрмінал на плошчы каля 40 га. Ужо пабудавана 5 км чыгункі, гэта працяг шляху са станцыі Шэметава, па якім завозіліся гаруча-змазачныя матэрыялы на тэрыторыю аэрапорта», — сказаў Кірыл Карацееў, дадаўшы, што такім чынам гэты тэрмінал на тэрыторыі парку «Вялікі камень» у наступным годзе будзе ўключаны ў агульную карту чыгунак як краіны, так і свету.
Што тычыцца пасажырскіх чыгуначных зносін, якія звяжа сталіцу з аэрапортам з адным прыпынкам — на тэрыторыі парку, то гэты праект яшчэ знаходзіцца ў рабоце. «Гэта доўга праектавалася, абмяркоўвалася. Былі ў мінулым годзе грамадскія абмеркаванні гэтага праекта. У гэтым годзе прынята рашэнне прыступіць да будаўніцтва. Цяпер фарміруюцца крыніцы фінансавання. Мы як парк пэўныя мерапрыемствы плануем зрабіць. Тэрміны рэалізацыі — да 2028-2029 гадоў, калі пойдуць першыя склады», — растлумачыў спецыяліст.
Паводле яго слоў, хуткасная электрычка будзе адпраўляцца з цэнтральнага чыгуначнага вакзала ў Мінску і рухацца паралельна аўтамабільнай трасе М2, якая вядзе ў аэрапорт і каля Кургана Славы паварочвае налева. Неабходную інфраструктуру прыйдзецца будаваць практычна з нуля, таму на час рэалізацыі такога складанага праекта закладваецца некалькі гадоў.
З нагоды іншых відаў транспартных зносін паміж Мінскам і «Вялікім каменем» спецыяліст растлумачыў, што ёсць планы па пэўных транспартных патоках, напрыклад з Уручча, але для іх рэалізацыі павінна ўзрасці колькасць працуючых у парку. «Цяпер іх 3,5 тыс. чалавек, і гэтага пакуль замала для таго, каб маштабаваць усе маршруты, — удакладніў Кірыл Карацееў. — Літаральна праз два гады мы прагназуем ужо 7-8 тыс. чалавек. Будуць прапрацоўвацца і іншыя маршруты. Гэта ўсё прадугледжана генпланам парку. Мы ідзем паслядоўна».
У будучыні парк «Вялікі камень» пазіцыянуецца як мінігорад — сатэліт Мінска з колькасцю пражываючых там каля 100 тыс. чалавек. Тут плануецца шматфункцыянальная забудова, якая ўключае і жыллё, і прамысловыя, вытворчыя аб’екты, і адміністрацыйную зону, зоны даследаванняў і распрацовак, рэкрэацыйныя зоны.
Прыклады падобнага паспяховага развіцця тэрыторый за кошт прадастаўлення спачатку льготных умоў і прыцягнення інвестыцый ўжо ёсць у Кітаі. Там з невялікіх рыбацкіх вёсак вырастаюць гарады, і адзін з яркіх прыкладаў — Шэньчжэнь.
