Каменціруючы журналістам законапраект, старшыня Пастаяннай камісіі Савета Рэспублікі па эканоміцы, бюджэце і фінансах Раман Бродаў адзначыў, што сёння на пасяджэнні Савета Рэспублікі разгледжаны адзін з сістэмных, фундаментальных законапраектаў у сферы эканамічных адносін. Ён вызначае як момант старту дзейнасці суб’екта гаспадарання любой юрыдычнай формы, так і працэс завяршэння яго работы, калі такое адбываецца.
«Адпаведна, узнікаюць абавязацельствы перад грамадствам, перад дзяржавай, перад людзьмі. Таму правілы ўваходжання ў гэтую сістэму праваадносін вельмі важныя. Яны вызначаюць і ўмовы вядзення бізнесу: наколькі лёгка ў краіне пачаць бізнес, наколькі лёгка яго весці, суправаджаць і гэтак далей», — сказаў Раман Бродаў.
Над законапраектам працавалі больш за пяць гадоў, практычна ўсю мінулую пяцігодку, звярнуў увагу старшыня Пастаяннай камісіі. «Зроблена нямала. Прааналізаваны велізарны пласт міжнароднага вопыту: тое, як гэта адбываецца ў іншых краінах, што мы не ўлічылі на папярэдніх этапах. Вельмі важна, што мы вывучылі назапашаны вопыт у сферы адносін з суб’ектамі гаспадарання, — сказаў Раман Бродаў. — Не сакрэт, што ў кагосьці ўзнікаюць патрэбы ў больш хуткіх працэдурах, хтосьці, на жаль, злоўжывае пэўнымі шчылінамі нормаў заканадаўства і выкарыстоўвае гэта супраць грамадзян, супраць дзяржавы, у тым ліку не даплачваючы падаткі, магчыма, дзесьці маючы запазычанасць па заработнай плаце перад людзьмі».
Старшыня Пастаяннай камісіі адзначыў, што ўсе навацыі законапраекта можна ўмоўна падзяліць на тры вялікія блокі. Першы — рэгуляванне тых пытанняў, якіх не было да сёння ў сістэме праваадносін. Другі блок — удасканаленне механізмаў, якія добра сябе зарэкамендавалі, але патрабуюць удакладнення, паляпшэння. Трэці блок — меры, накіраваныя на абарону грамадзян, інтарэсаў дзяржавы.
Раман Бродаў звярнуў увагу на такую навацыю, як увядзенне афіцыйнага статусу электроннай пошты, з дапамогай якой будзе ажыццяўляцца ўзаемадзеянне рэгіструючага органа і юрыдычнай асобы.«З іншага боку, дзяржава больш жорстка будзе наводзіць парадак па пытанні наяўнасці ў рэестры тых юрыдычных асоб, якія не ажыццяўляюць дзейнасць альбо ўжо падалі на ліквідацыю», — сказаў ён.
Акрамя таго, будуць устараняцца рознага роду злоўжыванні. Так, раней некаторыя юрыдычныя асобы маглі злоўжываць магчымасцю шматразовай падачы заяў аб ліквідацыі, тым самым прыпынялася выканаўчая вытворчасць. «Мы ліквідуем шчыліны ў сферы адносін, калі юрыдычная асоба магла закрыць, спыніць сваю дзейнасць, не выплаціўшы заработную плату, і пры гэтым зарэгістраваць новую. Цяпер такіх сітуацый больш не будзе», — сказаў ён.
«Асобным чынам будзе весціся рэестр патрабаванняў крэдытораў з тым, каб разумець, якія даўгі засталіся і з каго патрабаваць, калі яны ўзнікаюць на момант ліквідацыі», — дадаў ён.
У цэлым, па словах старшыні Пастаяннай камісіі, законапраект вельмі пазітыўны і важны. Ён цалкам адпавядае патрабаванням кіраўніка дзяржавы аб выбудоўванні сучаснай, эфектыўнай і празрыстай сістэмы дзяржаўнай рэгістрацыі суб’ектаў гаспадарання.
