На парадку дня — шэраг актуальных пытанняў: забеспячэнне бяспекі і прафілактыка гібелі дзяцей ад знешніх прычын, арганізацыя працаўладкавання і вольнага часу непаўналетніх у час летніх канікулаў, эфектыўнасць мер па прафілактыцы наркаманіі і выкарыстання электронных сістэм курэння.

У час пасяджэння была прааналізавана прадстаўленая інфармацыя, дадзены адпаведныя даручэнні дзяржорганам, дзяржаўным і іншым арганізацыям.

Так, Міністэрству адукацыі сумесна з МУС даручана распрацаваць вучэбна-метадычныя матэрыялы для арганізацыі вывучэння ва ўстановах агульнай сярэдняй адукацыі навацый правілаў дарожнага руху ў частцы выкарыстання веласіпедаў і сродкаў персанальнай мабільнасці. Міністэрствам адукацыі ў дзіцячых дашкольных установах будзе размешчана інфармацыя для бацькоў па пытаннях бяспечнай жыццядзейнасці дзяцей.

У маі на пасяджэннях раённых (гарадскіх) камісій па справах непаўналетніх будуць разгледжаны пытанні арганізацыі летняй занятасці дзяцей з акцэнтам на максімальнае ўцягненне падлеткаў, з якімі праводзіцца індывідуальная прафілактычная работа, дзяцей, у сем’ях якіх выяўлены крытэрыі і паказчыкі сацыяльна небяспечнага становішча, у работу аб’яднанняў па інтарэсах, спартыўных секцый, гурткоў ва ўстановах дадатковай адукацыі, культуры і спорту.

Міністэрствам аховы здароўя будзе арганізавана правядзенне ў дзяржаўных арганізацыях аховы здароўя наркалагічнага профілю дзён адчыненых дзвярэй з мэтай кансультавання непаўналетніх і іх бацькоў (законных прадстаўнікоў) па пытаннях шкоднага ўздзеяння электронных сістэм курэння на здароўе падлеткаў з асвятленнем інфармацыі аб іх правядзенні ў сродках масавай інфармацыі. Акрамя гэтага, сумесна з Нацыянальнай дзяржаўнай тэлерадыёкампаніяй будзе зняты ролік аб медыцынскіх наступствах ужывання дзецьмі псіхатропных рэчываў і электронных сістэм курэння.