Асобая ўвага ў рамках акцыі надаецца дзецям з сацыяльна-педагагічных устаноў, карэкцыйных цэнтраў, а таксама сем’ям, якія апынуліся ў складанай жыццёвай сітуацыі.

Так, напрыклад, у Віцебскай вобласці прадстаўнікі прафсаюзнай арганізацыі ААТ «Белаграпрамбанк» сустрэнуцца з выхаванцамі Дзіцячага цэнтра карэкцыйнага развіцця ў гарадскім пасёлку Лёзна. Для дзяцей рыхтуюць спартыўныя трэнажоры. У Мядзельскім раёне прафсаюзны актыў наведаў падшэфную сям’ю, у якой бабуля выхоўвае дзяцей-сірот, што засталіся без апекі бацькоў. Для дзяцей падрыхтаваны падарункі і святочная праграма.

Для дзяцей работнікаў — членаў прафсаюзаў была арганізавана насычаная культурна-забаўляльная праграма. Так, пры падтрымцы прафсаюзнай арганізацыі «ААБ Беларусбанк» у Паставах для хлопцаў выступіў Заслужаны калектыў Рэспублікі Беларусь — лялечны тэатр «Лялька». У Пінску дзеці разам з бацькамі акунуліся ў атмасферу яркага шоу «У гасцях у Вялікага Чараўніка».

«Для кожнага члена нашага прафсаюза яго дзеці — гэта самае галоўнае ў жыцці. Акцыя „Тыдзень добрых спраў“ заклікана падарыць свята кожнаму дзіцяці і ўдзяліць увагу тым, хто мае ў гэтым патрэбу. Для нас важна не толькі арганізаваць яркія мерапрыемствы, але і стварыць атмасферу клопату, душэўнага цяпла і падтрымкі. Менавіта такія ініцыятывы фарміруюць сапраўдную прафсаюзную салідарнасць, умацоўваюць традыцыі ўзаемадапамогі і паказваюць дзецям, што побач заўсёды ёсць людзі, гатовыя падтрымаць і падзяліць радасць», — адзначыў старшыня Банкаўска-фінансавага прафсаюза Дзмітрый Бачкоў.

Ён таксама падкрэсліў, што прафсаюз імкнецца размаўляць з дзецьмі на сучаснай і зразумелай ім мове, таму сёлета да святочных ініцыятыў запушчаны новы адукацыйны праект «Вуснамі вялікага чалавека», які рэалізуецца на інфармацыйных рэсурсах галіновага прафсаюза і накіраваны на развіццё фінансавай пісьменнасці ў дзяцей. Яго асаблівасць у тым, што складаныя паняцці самі хлопцы і дзяўчаты тлумачаць сваім аднагодкам простымі і зразумелымі словамі. Юныя ўдзельнікі, напрыклад, расказваюць пра тое, што такое «калектыўны дагавор», «дэпазіт», а таксама тлумачаць сучасныя тэрміны, напрыклад, «крыптавалюту».
Праект не толькі дапамагае дзецям даведвацца аб асновах фінансавай культуры, але і выклікае цікавасць дзяцей да прафесій іх бацькоў.

Трэба адзначыць, што галіновы прафсаюз на пастаяннай аснове ўдзяляе ўвагу падтрымцы дзяцей. Арганізацыі летняга аздараўлення, падрыхтоўка да Дня ведаў, Новы год — гэта сістэмная праца круглы год.

Алена КРАВЕЦ