Бакі выказалі агульную зацікаўленасць сумесна працаваць у частцы падрыхтоўкі і перападрыхтоўкі прафсаюзных кадраў і актыву дзвюх краін, абмене лепшымі практыкамі, удасканаленні сістэмы прафесійнага навучання, правядзенні даследаванняў у сферы працоўных і сацыяльных адносін.
У цэлым дэлегацыі абмеркавалі шырокае кола пытанняў. Прафсаюзныя ВНУ дзвюх краін з’яўляюцца кампетэнтнымі і аўтарытэтнымі навуковымі пляцоўкамі і дазваляюць нацыянальным прафцэнтрам выпрацоўваць рашэнні, якія сёння неабходна прымяняць у заканадаўстве аб працы і аб ахове працы. На сустрэчы гэтым кірункам работы была ўдзелена асаблівая ўвага. Таксама бакі абмеркавалі магчымасць пашырэння праграм акадэмічных абменаў і ўзаемадзеяння прафесарска-выкладчыцкіх саставаў.
Намеснік старшыні ФПБ Вадзім Грачоў адзначыў, што прафсаюзныя альма-матар дзвюх краін актыўна ўзаемадзейнічаюць яшчэ з 2008 года, і за гэты час зроблена нямала. Між тым, сёння бакі бачаць рэзервы для нарошчвання маштабаў супрацоўніцтва.
— Ва ўмовах стратэгічнага партнёрства паміж Беларуссю і Кітаем, прафсаюзы дзвюх краін імкнуцца да больш шчыльнага ўзаемадзеяння па ўсіх пытаннях. Прафсаюзныя ўніверсітэты маюць велізарны назапашаны вопыт і выкарыстоўваюць перадавыя практыкі, якімі варта актыўна абменьвацца, — дадаў Вадзім Грачоў.
Дарэчы, дэлегацыя кітайскай прафсаюзнай ВНУ на чале з яе віцэ-прэзідэнтам Вэнь Сяоі прыбыла ў Беларусь яшчэ ў пачатку гэтага тыдня, і шэраг сумесных мерапрыемстваў па абмене вопытам ужо адбыўся.
— У нашым універсітэце ёсць Цэнтр аховы працы, і ён вельмі зацікавіў нашых кітайскіх калег. Для прафсаюзаў Кітая таксама вельмі актуальна тэма забеспячэння здаровых, бяспечных умоў працы. Мы дамовіліся аб тым, што ўжо ў бліжэйшы час абмяняемся напрацоўкамі па гэтым кірунку. Таксама дасягнуты дамоўленасці аб цыкле лекцый прафсаюзных вучоных Кітайскага ўніверсітэта працоўных адносін, якія раскажуць аб сваіх лепшых практыках. Мы, безумоўна, таксама падзелімся вопытам па кірунках прафсаюзнай работы, — расказаў рэктар Міжнароднага ўніверсітэта ФПБ МІПСА Уладзімір Пазнякоў.
Трэба адзначыць, што ўжо ў бліжэйшай перспектыве бакі маюць намер арганізаваць кароткатэрміновыя курсы для прафсаюзных актывістаў у фармаце зімовых і летніх школ. А новым вектарам супрацоўніцтва стане правядзенне сумесных даследаванняў у сферы сацыяльна-працоўных адносін.
— На перспектыву запланаваны цыкл сумесных навуковых даследаванняў у сферы працоўнага права. Нам ёсць чаму павучыцца адзін у аднаго, улічваючы, што многія перадавыя практыкі могуць быць выкарыстаны як у Беларусі, так і Кітаі, — рэзюмаваў Уладзімір Пазнякоў.
Заснавальнікам кітайскай ВНУ выступае Усекітайская федэрацыя прафсаюзаў. Гэта навучальная ўстанова з’яўляецца навукова-адукацыйным цэнтрам прафсаюзаў Паднябеснай і, па сутнасці, аналагам Міжнароднага ўніверсітэта ФПБ «МІПСА».
Алена КРАВЕЦ
