Першапачаткова прафактывісты працавалі на аб’ектах, дзе патрабавалася максімальна хутка прыбраць наступствы непагадзі. У прыватнасці, на тэрыторыі дзіцячых садоў і школ працавалі не толькі прадстаўнікі галіновага прафсаюза адукацыі, але і маладзёжнай рады абласнога аб’яднання прафсаюзаў. Абласная арганізацыя Белхімпрафсаюза дапамагае наводзіць парадак на тэрыторыі ААТ «Магілёўхімвалакно», якому стыхіяй таксама нанесены пэўны ўрон.

На гэты момант створаны працоўныя атрады з прадстаўнікоў усіх галіновых прафсаюзаў Магілёўшчыны, якія штодзень дапамагаюць камунальнікам у навядзенні парадку. У такім фармаце прафсаюзы будуць працаваць як мінімум увесь тыдзень.

— Таксама прафсаюзамі аказваецца падтрымка ў стварэнні неабходных умоў для работнікаў, занятых на ліквідацыі наступстваў урагану, — расказалі ў прэс-службе ФПБ. — У аднаўленчых работах задзейнічаны сотні спецыялізаваных брыгад, у тым ліку і з іншых рэгіёнаў. І для ўсіх іх у самыя кароткія тэрміны неабходна было вырашыць пытанні з пражываннем, харчаваннем. У прыватнасці, прафсаюз работнікаў энергетыкі, газавай і паліўнай прамысловасці аказаў садзейнічанне ў арганізацыі харчавання, забеспячэнні пітной вадой работнікаў аварыйных брыгад. Акрамя таго, Федэрацыяй прафсаюзаў Беларусі і галіновымі прафсаюзамі аказваецца дапамога ў закупцы неабходнага інвентару для работы спецыялістаў.

На сёння асаблівую ўвагу прафсаюзы таксама надаюць пытанню аказання дапамогі людзям, якія пацярпелі ад урагану. Напрыклад, прафсаюз работнікаў аховы здароўя гатовы падтрымаць членаў прафсаюза — работнікаў сістэмы аховы здароўя ў выпадку, калі ім самім або іх маёмасці быў нанесены ўрон нядаўняй стыхіяй. У прыватнасці, такая падтрымка прадугледжана дзейным палажэннем аб парадку аказання матэрыяльнай дапамогі членам прафсаюза са сродкаў Магілёўскай абласной арганізацыі прафсаюза. У залежнасці ад памеру ўрону сума прафсаюзнай матдапамогі абкама можа складаць да 10 базавых велічынь. Акрамя таго, у выпадку прычыненага стыхіяй матэрыяльнага ўрону ў асабліва буйных памерах члены галіновага прафсаюза ў праве разлічваць на матдапамогу да 50 базавых велічынь ад Рэспубліканскага камітэта прафсаюза работнікаў аховы здароўя.

Аказанне дапамогі і падтрымкі членам прафсаюза, якія пацярпелі ў выніку стыхіі, прадугледжана і дакументамі іншых галіновых прафсаюзаў, напрыклад, прамысловасці, гандлю і інш.

Алена КРАВЕЦ.