У Федэрацыі прафсаюзаў Беларусі падвялі вынікі грамадскага кантролю па абароне працоўных правоў і сацыяльна-эканамічных інтарэсаў за мінулы год. Прававыя інспектары працы ФПБ на пастаяннай аснове праводзяць маніторынгі і праверкі. Нагадаем, што для правядзення такіх мерапрыемстваў згоды ці дазволу кіраўніка арганізацыі не патрабуецца.
— Найбольш распаўсюджаныя парушэнні заканадаўства аб працы, якія выявілі прафсаюзныя юрысты, гэта парушэнні пры прадастаўленні працоўных і сацыяльных водпускаў, устанаўленні працоўнага часу і часу адпачынку, заключэнні, змяненні і прадаўжэнні кантрактаў, вядзенні працоўных кніжак і выплаце заработнай платы, — расказала начальнік галоўнага ўпраўлення юрыдычнай работы і прававога забеспячэння ФПБ Марына Лазар. — У мінулым годзе прафсаюзы выявілі звыш 46 тысяч парушэнняў заканадаўства аб працы. Пры гэтым наймальнікі аператыўна рэагуюць на заўвагі прафсаюзаў: 97 працэнтаў усіх выяўленых парушэнняў былі аператыўна ліквідаваны.
У тым ліку па патрабаванні прававых інспектараў і прадстаўнікоў прафсаюзаў у 2024 годзе работнікам вярнулі больш за 8 мільёнаў рублёў, якія былі незаконна ўтрыманы або не выплачаны ва ўстаноўлены тэрмін наймальнікамі. Акрамя таго, 32 работнікі летась былі адноўлены на працы пры непасрэдным удзеле прафсаюзаў.
Як падкрэсліла Марына Лазар, у большасці выпадкаў удаецца знайсці паразуменне з наймальнікамі і вырашаць працоўныя спрэчкі ў ходзе перагавораў. Разам з тым пры неабходнасці прафсаюзы абараняюць інтарэсы работнікаў і ў судах. Гэта дапамога ў падрыхтоўцы працэсуальных дакументаў, непасрэдна прадстаўленне інтарэсаў членаў прафсаюзаў пры разглядзе спрэчных сітуацый, звязаных з працоўнымі адносінамі, у судзе. Дарэчы, паводле вынікаў мінулага года большасць судовых спраў, у якіх прафсаюзы прадстаўлялі інтарэсы работнікаў, вырашаны на карысць людзей.
