18 ліпеня кіраўнік дзяржавы заслухаў даклад старшыні Брэсцкага абласнога выканаўчага камітэта Пятра Пархомчыка, паведамілі ў прэс-службе беларускага лідара. Прэзідэнту даложана аб сацыяльна-эканамічным развіцці вобласці па выніках паўгоддзя. У цяперашні час усе напрамкі эканомікі рэгіёна дэманструюць прырост да ўзроўню мінулага года. На гэта паказвае валавы рэгіянальны прадукт, тэмп росту якога па выніках шасці месяцаў перавысіў 103 %. 

Цэнтральнай тэмай даклада стаў ход уборачнай кампаніі ў рэгіёне, а таксама сітуацыя ў сферы сельскай гаспадаркі ў цэлым. Аляксандр Лукашэнка падрабязна цікавіўся бягучымі вынікамі работы брэсцкіх аграрыяў і відамі на ўраджай. Як было даложана Прэзідэнту, у рэгіёне завяршылі ўборку азімага ячменю і прыступілі да ўборкі азімага рапсу. У цэлым перад аграрыямі Брэсцкай вобласці стаіць задача выйсці на 2,3 мільёна тон збожжавых і зернебабовых культур па выніках сезона.

Асобным пытаннем стала сэрвіснае абслугоўванне і стварэнне неабходных умоў для рамонту сельскагаспадарчай тэхнікі. Як далажыў кіраўнік Брэсцкай вобласці, на працягу паўтара года ў рэгіёне плануюць прывесці ў парадак усе аграсэрвісы.

Акрамя таго, даложана аб вытворчасці айчыннага прэс-падборшчыка. У найбліжэйшыя дні будзе атрыманы апошні варыянт доследнага ўзору, выраблены на прадпрыемстве «Бабруйскаграмаш», а ўжо да канца месяца яго павінны прадэманстраваць Прэзідэнту.

Яшчэ адна тэма даклада — сітуацыя ў прамысловасці. У гэтай сферы тэмп росту да ўзроўню мінулага года склаў 105,5 %. Такі вынік дасягнуты не толькі за кошт вядучых прадпрыемстваў рэгіёна, але і прыватных кампаній.

«Пастаўленыя задачы Прэзідэнтам і ўрадам у Брэсцкай вобласці выкананы на 100 %»

У размове з журналістамі старшыня Брэсцкага аблвыканкама Пётр Пархомчык падкрэсліў, што валавы рэгіянальны прадукт Брэсцкай вобласці ў студзені — чэрвені 2026 года вырас на 3,2 %. Кіраўнік дзяржавы пацікавіўся сацыяльна-эканамічным развіццём Брэсцкай вобласці ў першай палове 2026 года.

«Пастаўленыя Прэзідэнтам і ўрадам задачы ў Брэсцкай вобласці выкананы на 100 %. Усе віды эканомікі, напрамкі маюць станоўчую дынаміку да ўзроўню мінулага года. Унутраны рэгіянальны прадукт — як асноўны абагульняючы эканамічны паказчык — па выніках шасці месяцаў тэмп росту склаў 103,2 %. За пяць месяцаў было 102,9 %», — расказаў губернатар Брэстчыны.

Паводле яго слоў, добрую дынаміку дэманструе сельская гаспадарка. У студзені-чэрвені тэмп росту склаў 105,3 %. «Добра спрацавала прамысловасць. Дынаміка да ўзроўню мінулага года склала 105,5 %. Будучыня нашай вобласці — інвестыцыі, яны таксама выраслі — склалі 103 %», — канкрэтызаваў Пётр Пархомчык. 

Ён звярнуў увагу, што паўднёва-заходні рэгіён правёў актыўную работу па прыцягненні інвестыцый у 2024-2025 гадах. «Дынаміка захоўваецца. Ёсць вялікая колькасць інвестыцыйных праектаў, якія ствараюць будучую эканоміку Брэсцкай вобласці», — дадаў кіраўнік рэгіёна. 

Прэзідэнта цікавілі пытанні сацыяльнага блока. Адзін з прыярытэтаў — павышэнне даходаў насельніцтва. «Сярэдні заробак — 2 545 рублёў. Ён працягвае расці, — канстатаваў Пётр Пархомчык. — Кіраўнік дзяржавы пацікавіўся пытаннямі будаўніцтва. Тут таксама ёсць чаму парадавацца: цалкам выканалі пастаўленыя ўрадам задачы. Забяспечылі будаўніцтва 269,5 тысячы квадратных метраў жылля».

Брэсцкая вобласць дэманструе прырост у экспарце. «Нягледзячы на ўсе знешнія перашкоды, платы, якія нам спрабуюць зладзіць, прырастаем значна. Па выніках пяці месяцаў дынаміка росту склала 123,6 %», — паведаміў кіраўнік Брэсцкай вобласці. 

Ён акцэнтаваў увагу, што прырост адчуваецца на ўсіх рынках, куды прадпрыемствы пастаўляюць свае тавары: у Расію, суседнія дзяржавы і краіны далёкай дугі. «Радуе, што прадукцыя карыстаецца павышаным попытам. Ёсць спажывец, які стабільна набывае нашу прадукцыю», — дадаў старшыня Брэсцкага аблвыканкама.

Уборачная кампанія стала самым галоўным блокам даклада

Паводле яго слоў, у рэгіёне сёлета нацэлены сабраць каля 2,3 мільёна тон збожжавых, кукурузы і рапсу. Менавіта ўборачная кампанія стала самым галоўным блокам даклада. «Прэзідэнта цікавіла, што адбываецца цяпер у Брэсцкай вобласці. Ён добра дасведчаны аб кліматычных умовах, у якіх апынулася Брэстчына ў маі-чэрвені. Ведае, колькі ападкаў выпала. Яго хвалявала, які будзе ўраджай у Брэсцкай вобласці па выніках гэтага года. Адразу папярэдзіў: не менш таго, што было летась. Я маю на ўвазе валавы збор збожжавых і зернебабовых, рапсу, кукурузы і іншых культур», — канкрэтызаваў Пётр Пархомчык.

Аграрыі паўднёва-заходняга рэгіёна летась у бункернай вазе атрымалі каля 2,2 мільёна тон збожжавых і зернебабовых. «Цяпер стаіць задача дадаць да гэтага. Мы для сябе паставілі задачу выйсці на ўзровень 2,3 мільёна тон. І прытрымліваемся гэтай лічбы», — падкрэсліў губернатар.

На палях Брэстчыны практычна завяршылі ўборку азімага ячменю. Атрымалі каля 160 тысяч тон збожжа, сярэдняя ўраджайнасць складае больш за 47,1 ц/га. Гаспадаркі рэгіёна ўбіраюць іншыя культуры. Асобна кіраўнік вобласці закрануў азімы рапс. «Тут таксама вынікі ўражваюць. Ураджайнасць вышэйшая, чым летась. Бачым, што азімы рапс удаўся», — падзяліўся ён. 

Прэзідэнта цікавіла эфектыўнасць работы сельскай гаспадаркі ў цэлым. У студзені-чэрвені дынаміка росту склала 105,3 %. «Па малаку лічбы ўражальныя. Мы расцём ужо чацвёрты год запар, захоўваецца дынаміка ў межах 105,5 %. За першае паўгоддзе валавая вытворчасць малака склала 1 мільён 304 тысячы тон. На адну карову атрымалі 4 тысячы 297 кілаграмаў, гэта сярэдні надой. Ёсць у нас і лідары ў гэтай галіне. Гэта Іванаўскі і Брэсцкі раёны», — адзначыў старшыня Брэсцкага аблвыканкама. Асобна гаворка зайшла пра мясную жывёлагадоўлю, вытворчасць птушкі, яек. Тэмп росту знаходзіцца ў дыяпазоне 103-105 % па ўсіх пазіцыях.

Айчынны прэс-падборшчык і аграсэрвісы

Прэзідэнт таксама задаў пытанні, якія датычацца даручэнняў, звязаных з сэрвісам, абслугоўваннем, стварэннем палепшаных умоў для рамонту тэхнікі і забеспячэння запчасткамі. «Ён спасылаўся на Шклоўскі варыянт. З’ездзім і паглядзім, вядома. Але мы таксама зацвердзілі свой план развіцця. Прэзідэнту далажыў, што на працягу паўтара года (гэты і наступны год) мы завершым усе работы. Зацверджана Праграма прывядзення ў парадак усіх аграсэрвісаў на тэрыторыі Брэсцкай вобласці, і гэтая работа выконваецца», — падкрэсліў Пётр Пархомчык. 

Ён звярнуў увагу, што сур’ёзная размова адбылася па блоку сельгасхіміі. У гэтай галіне ў рэгіёне таксама сфарміравалі праграму развіцця па аналогіі з райаграсэрвісамі. «Бачым, што частка абсталявання, якое мы выкарыстоўваем для захоўвання, адпрацавала ўжо свой рэсурс. Я гэта Прэзідэнту расказаў. Патрабуецца, напэўна, падтрымка ў пэўнай ступені дзяржавы ў рамках 146-га ўказа, — дадаў кіраўнік Брэсцкай вобласці. — Таксама было падтрымана». 

Размова зайшла аб айчынным прэс-падборшчыку. «Прэзідэнт сказаў, каб я ў бліжэйшыя дні забраў з „Бабруйскаграмаша“ апошні варыянт досдеднага ўзору, два тыдні абкатаў на палях Брэсцкай вобласці і зрабіў адпаведнае заключэнне. „Бабруйскаграмаш“ выканаў даручэнне Прэзідэнта ў частцы вырабу доследных узораў. Цяпер мы павінны пацвердзіць, наколькі гэты праект жыццяздольны, наколькі адпавядае канструктарскай дакументацыі», — адзначыў Пётр Пархомчык. 

Ён дадаў, што на палях паўднёва-заходняга рэгіёна таксама выкарыстоўваюць прэс-падборшчык кітайскай вытворчасці. Першыя вынікі паказваюць, што ён не саступае аналагам іншых вытворцаў. «У нас нядрэнныя адносіны з кітайскай кампаніяй, якая гатова перадаць тэхналогіі для арганізацыі вытворчасці прэс-падборшчыкаў. Калі пацвердзіцца, што ён мае добры тэхнічны рэсурс, выконвае на ўборачнай усе неабходныя патрабаванні і аперацыі, то будзем арганізоўваць вытворчасць прэс-падборшчыкаў у Брэсцкай вобласці», — дадаў губернатар Брэстчыны.

Вынікі ў прамысловасці і перапрацоўка малака

Даклад кіраўніку дзяржавы датычыўся шырокага спектра пытанняў. Адно з іх — работа прамысловасці ў першай палове года. «Брэсцкая вобласць нарасціла аб’ёмы вытворчасці. Тэмп росту складае 105,5 %», — сказаў Пётр Пархомчык. Ён падкрэсліў, што для развіцця неабходная здаровая канкурэнцыя, і прывёў некалькі прыкладаў.

Так, кіраўнік вобласці расказаў аб праекце «Мідэа» па вытворчасці халадзільнікаў. На гэтай пляцоўцы павялічылі аб’ёмы выпускаемай прадукцыі. Пераважная большасць адгружаецца на экспарт. 

«Кампанія „СТіМ“ — інавацыйная, прапануе распрацоўкі з дапамогай лічбавізацыі і штучнага інтэлекту, з’яўляецца вытворцам арыгінальнага абсталявання. Не толькі прадаюць тое, што вырабляюць, але яшчэ прапануюць выконваць паслугі па нанясенні дарожнай разметкі. У іх ёсць заказы. Напрыклад, у Татарстане прыводзяць дарогі ў парадак», — звярнуў увагу старшыня Брэсцкага аблвыканкама. Прадпрыемства працуе над тым, каб павялічваць рэсурс выкарыстання дарожнай разметкі. 

У частцы ўкаранення аўтаматызацыі і рабатызацыі Пётр Пархомчык прывёў у прыклад акумулятарныя вытворчасці, якія працуюць на тэрыторыі Брэсцкай вобласці. 

Адзін з флагманаў у перапрацоўчай прамысловасці — «Савушкін прадукт». «Вынікі ўражальныя, дынаміка выдатная, колькасць малака ў перапрацоўцы павялічваецца. Па даручэнні Прэзідэнта яны зараз вырашаюць два вельмі сур’ёзныя інвестыцыйныя праекты на тэрыторыі Віцебскай вобласці. Пытанне знаходзіцца на жорсткім кантролі як урада, так і кіраўніцтва Брэсцкай вобласці. Малакаперапрацоўчыя заводы — Аршанскі і Полацкі — зменяцца літаральна да канца гэтага года. З’явяцца новыя тэхналогіі, новае аўтаматычнае абсталяванне. Дзесьці 6-7 месяцаў спатрэбіцца, каб выйсці на вытворчыя магутнасці, вызначыць вельмі выразна асартымент прадукцыі. Гатовыя дапамагчы Віцебскай вобласці ў вырашэнні гэтых пытанняў», — запэўніў кіраўнік Брэсцкага рэгіёна.

На тэрыторыі вобласці працуе вялікая колькасць прадпрыемстваў як дзяржаўнай, так і прыватнай формаў уласнасці. Кожнае з іх уносіць уклад у рост прамысловай вытворчасці рэгіёна. «Прамысловасць у надзейных руках. Будзем працягваць удасканальваць, — падкрэсліў Пётр Пархомчык. — Для развіцця прамысловасці важныя інвестыцыі. У нас каля 200 праектаў, якія знаходзяцца на кантролі: як рэгіянальных, так і інавацыйных, імпартазамяшчальных. Вырашаны пытанні фінансавання, што дасць наступны штуршок развіццю Брэсцкай вобласці на бліжэйшую перспектыву».

Узбекістан накіраваны цесна супрацоўнічаць з Брэсцкай вобласцю ў сельскай гаспадарцы і перапрацоўчай прамысловасці

Пётр Пархомчык паведаміў, што падчас даклада асобная ўвага была ўдзелена супрацоўніцтву з Узбекістанам. Гэта прыярытэт для абедзвюх краін. «Учора ў мяне адбылася размова з маім калегам з Бухары. Яны вельмі зацікаўлены ў пэўным вопыце: у падрыхтоўцы кадраў у галіне сельскай гаспадаркі, перапрацоўкі малака і мяса з улікам выкарыстання нашых тэхналогій, нашага абсталявання, якое вырабляюць нашы прадпрыемствы», — пералічыў кіраўнік Брэстчыны. 

Ён падкрэсліў, што гэтыя пытанні былі дэталёва абмеркаваны з узбекскім бокам. «У верасні адбудзецца сустрэча ва Узбекістане бізнесу і нашых парламентарыяў. Будзем рыхтаваць канкрэтную дарожную карту, каб яе ў бліжэйшыя два-тры гады рэалізаваць», — адзначыў Пётр Пархомчык. 

Паводле яго слоў, прадстаўнікі Бухарскай вобласці Узбекістана выказваюць гатоўнасць да работы на Брэстчыне ў раслінаводстве і жывёлагадоўлі. «Для таго, чаго ў нас няма або нам не хапае, мы не супраць даць зямлю, хай вырошчваюць. Абмяркуем гэтыя пытанні ў верасні», — падагульніў губернатар Брэстчыны.

Данііл ХМЯЛЬНІЦКІ

Фота БелТА