Дэпартамент па наглядзе за бяспечным вядзеннем работ у прамысловасці МНС Беларусі ажыццяўляе ўскладзеныя на яго задачы па нагляднай дзейнасці ў наступных галінах: прамысловая бяспека, перавозка небяспечных грузаў, папярэджанне аварый і інцыдэнтаў на небяспечных вытворчых аб’ектах і патэнцыяльна небяспечных аб’ектах. Ведамства актыўна бярэ ўдзел у рэалізацыі дзяржаўнай палітыкі ў прамбяспецы і перавозцы небяспечных грузаў.
Намеснік начальніка Дэпартамента па наглядзе за бяспечным вядзеннем работ у прамысловасці Міністэрства па надзвычайных сітуацыях Дзмітрый Воўк праінфармаваў, што сёння пад кантролем іх ведамства знаходзяцца больш за 51 тысячу ліфтаў, звыш 10 тысяч грузапад’ёмных збудаванняў рознага тыпу (пад’ёмныя, аўтамабільныя, вежавыя краны), аб’екты нафтахіміі, больш за 190 атракцыёнаў, а таксама ўсе піратэхнічныя вырабы 4-5 класаў, якія ўвозяць у краіну. Асаблівая ўвага — інвестыцыйным аб’ектам, у тым ліку ААТ «Гродна Азот», Мазырскаму НПЗ, ААТ «Нафтан» і іншым.
Спецыялісты дэпартамента таксама распрацоўваюць нарматыўныя дакументы. Сярод найважнейшых — закон аб магістральным трубаправодным транспарце, унясенне змяненняў і дапаўненняў у закон аб прамысловай бяспецы.
Прадстаўнікі Дзяржпрамнагляду паспяхова супрацоўнічаюць са спецыялістамі Растэхнагляду. Наладжана супрацоўніцтва з Узбекістанам, Казахстанам і іншымі краінамі, вядзецца работа па тэхнічных рэгламентах Мытнага саюза.
Намеснік начальніка ўпраўлення нагляду за бяспекай пры перавозцы небяспечных грузаў Дэпартамента па наглядзе за бяспечным вядзеннем работ у прамысловасці Міністэрства па надзвычайных сітуацыях Алег Шаверда адзначыў, што ўпраўленне працуе па чатырох кірунках: аўтамабільным, чыгуначным, унутраным водным і авіяцыйным транспарце.
Небяспечныя грузы — гэта, як правіла, хімічныя рэчывы, што валодаюць пэўнымі ўласцівасцямі, праяўленне якіх пры перавозцы можа прывесці да пажару, уцечкі, прасыпання, — непажаданых наступстваў для навакольнага асяроддзя і чалавека. Каб гэтага не адбылося, існуе шэраг патрабаванняў. Яны датычацца падрыхтоўкі персаналу, належнага стану транспарту, прымянення бяспечнай тары.
Начальнік упраўлення ліцэнзавання і дазвольнай работы Дэпартамента па наглядзе за бяспечным вядзеннем работ у прамысловасці Міністэрства па надзвычайных сітуацыях Іна Саўчанка заявіла, што ліцэнзаванне неабходна ў мэтах забеспячэння абароны дзяржаўных і грамадскіх інтарэсаў, жыцця, здароўя, правоў і законных інтарэсаў грамадзян, навакольнага асяроддзя. Усё гэта ў поўнай меры датычыцца і дзейнасці ў галіне прамысловай бяспекі. Да яе адносіцца выраб і захоўванне прамысловых выбуховых матэрыялаў, выкананне выбуховых работ, зборка піратэхнічных вырабаў, эксплуатацыя небяспечных вытворчых аб’ектаў, праектаванне, мантаж, наладка, абслугоўванне, тэхнічнае дыягнаставанне і рамонт патэнцыяльна небяспечных аб’ектаў і тэхнічных прылад.
У прыватнасці, яна адзначыла, што інфармацыя аб ліцэнзіях на дзейнасць у галіне прамысловай бяспекі змяшчаецца ў дзяржаўнай інфармацыйнай сістэме «Адзіны рэестр ліцэнзій». Доступ да яе забяспечваецца кругласутачна, без аплаты.
