«Лічу, што пытанне вельмі важнае і актуальнае для краіны ў цэлым», — адзначыў беларускі лідар.

Ён папрасіў парламентарыяў удзяліць сур’ёзную ўвагу гэтаму пытанню. Кіраўнік дзяржавы прапанаваў абмеркаваць найбольш вострыя навелы дакумента, каб вызначыць падыходы да яго далейшай дапрацоўкі ў парламенце.

Гаворачы пра сам тэрмін «ліцэнзаванне», Аляксандр Лукашэнка адзначыў, што гэта свайго роду правілы гульні. «У аснове ляжыць дазвол. Ёсць ліцэнзія — іду працую. Могуць быць і абмежаванні, — сказаў ён. — Неабходна разумець, што калі мы гаворым пра абмежаванні, то яны з’яўляюцца вымушанымі і павінны быць накіраваны на карысць, а не на шкоду».

«Ліцэнзаванне — не самамэта. Зарэгуляваць можна любы від дзейнасці. Але залішнія бар’еры, недастаткова ўзважаныя рашэнні, нават недапрацаваныя фармулёўкі могуць вельмі неспрыяльна адбіцца як на людзях, так і на эканоміцы», — адзначыў Прэзідэнт.

Аляксандр Лукашэнка на нарадзе абазначыў падыходы па пытанні ўвядзення ліцэнзавання дадатковай адукацыі дзяцей і моладзі. Гэта прадугледжана падрыхтаваным Міністэрствам эканомікі праектам закона «Аб змяненні законаў па пытаннях ліцэнзавання».

«Мы паслядоўна на працягу шэрага гадоў данастройваем дзяржаўнае рэгуляванне адукацыйнай дзейнасці. Падкрэслю, данастройваем, а не закручваем гайкі, як часам спрабуюць гэта падаць нядобрасумленныя СМІ або псеўдаэксперты, якія ўцяклі за мяжу, — сказаў кіраўнік дзяржавы. — Ні ў якім разе не трэба залішне глядзець па баках. Трэба рабіць тое, што выгадна для нашай дзяржавы. Вядома, меркаванні мы будзем заўсёды ўлічваць».

«У пытанні ліцэнзавання адукацыі павінна быць пастаўлена кропка», — заявіў Прэзідэнт.

«Асноўнае патрабаванне ў гэтым пытанні — абараніць нашых дзяцей ад усялякіх прайдох, забяспечыць роўныя ўмовы работы як для дзяржаўных, так і для прыватных суб’ектаў», — сказаў кіраўнік дзяржавы.

Аляксандр Лукашэнка падкрэсліў, што сфера адукацыі з’яўляецца дзяржаваўтваральнай. «Таму мы яе будзем рэгуляваць з улікам нацыянальных інтарэсаў. Як бы камусьці гэта ні падабалася», — адзначыў беларускі лідар.

Прэзідэнт папрасіў далажыць, як ліцэнзаванне адукацыі ўжо сябе паказала, ці ўдалося навесці парадак у галіне. Ён адзначыў, што крытэрыі для атрымання ліцэнзіі павінны быць дакладныя і зразумелыя для ўсіх, і пацікавіўся, якія меры плануецца прыняць, каб не ствараць непатрэбнага напружання і ў галіне, і ў грамадстве.