Адказваючы на пытанне, як Прэзідэнт ЗША Дональд Трамп ставіцца да беларускага народа і кіраўніка дзяржавы Аляксандра Лукашэнкі, Франклін Грэм сказаў: «Ён хоча, каб адносіны паляпшаліся. Прэзідэнты Трамп і Лукашэнка вельмі падобныя адзін на аднаго. Яны моцныя лідары, людзі з бачаннем будучыні. Будзе добра, каб гэтыя два лідары сустрэліся адзін з адным як мага раней. Гэта будзе добра для ўсіх».

«Я тут як прапаведнік Евангелля. Я не палітык. Я не працую на ўрад ЗША. Я проста чалавек, які дзеліцца пасланнем пра любоў Госпада да ўсіх. Мы сябры з Прэзідэнтам Трампам. Часам я выконваю ролю яго духоўнага дарадцы. Мы не можам ігнараваць палітыкаў. Нягледзячы на тое, што я прапаведнік, мы павінны працаваць з палітыкамі, натхняць, маліцца за іх», — сказаў амерыканскі прапаведнік.

Франклін Грэм падзяліўся, што яму вельмі спадабаліся зносіны з Прэзідэнтам Беларусі, і ў іх адбылася адкрытая дыскусія па рэлігійных пытаннях. «У нас адбылася выдатная размова з Прэзідэнтам. Мы гаварылі аб многіх пытаннях. Я спадзяюся, што мы зможам працаваць разам дзеля лепшага ўзаемаразумення паміж ЗША і Беларуссю. Што мы зможам стаць сведкамі ўмацавання адносін. Ён мне вельмі спадабаўся. Вельмі адкрыты, з ім лёгка камунікаваць», — адзначыў ён.

Прапаведнік падкрэсліў, што з улікам вялікай колькасці праблем у свеце трэба працаваць не асобна, а разам над іх рашэннем. «Я падтрымліваю мір. І я перакананы, што гэтак жа і Прэзідэнт Лукашэнка, і, ведаю, Прэзідэнт Трамп», — заявіў Франклін Грэм.

Што датычыцца ўражанняў ад наведвання Беларусі і яе сталіцы, прапаведнік сказаў: «Я вельмі ўражаны прыгажосцю гэтай краіны і яе людзьмі!»