Папулярная працэдура нарошчвання веек можа прывесці да пашкоджання рагавіцы і моцнага зніжэння зроку, паведаміла афтальмолаг Ганна Шамарава, піша «Лента.ру».

Урач таксама пералічыла небяспечныя наступствы б’юці-працэдуры, папярэдзіўшы, што экстрэмальныя аб’ёмы 4-5D нясуць павышаныя рызыкі.

Спецыяліст растлумачыла, што працэдура праводзіцца ў непасрэднай блізкасці ад вока, а масіўныя штучныя вейкі ствараюць сур’ёзную нагрузку на вейкавы край. 

Па словах афтальмолага, сярод найбольш частых наступстваў — алергічны блефарыт і кератакан’юнктывіт, выкліканыя рэакцыяй на кампаненты клею. Аднак, як адзначыла эксперт, значна больш небяспечныя механічныя пашкоджанні рагавіцы.

«Калі далучаецца інфекцыя, можа развіцца мікробны кератыт… Гэта інфекцыя можа прывесці да язвы рагавіцы, а пасля лячэння пакінуць шчыльны рубец, з-за якога зрок можа значна знізіцца», — папярэдзіла ўрач.

Акрамя таго, афтальмолаг дадала, што штучныя вейкі перашкаджаюць паўнацэннаму марганню і змыканню павек. Гэта, у сваю чаргу, правакуе сістэматычную сухасць вачэй, адчуванне пяску, нестабільны зрок і дыскамфорт пры нашэнні лінзаў.

Рагавіца горш абараняецца слёзнай плёнкай і становіцца больш уразлівай да мікрапашкоджанняў. Таксама эксперт адзначыла, што дадатковая нагрузка на фалікулы часта прыводзіць да станчэння, ломкасці і выпадзення ўласных веек.