«Настрой баявы, працуем»

Ваеннаслужачыя 11-й асобнай гвардзейскай механізаванай брыгады адпрацавалі дзеянні па абароне ўмацаванага раёна. Пасля маршу механізаваных калон у раён прызначэння падраздзяленні разгарнуліся на абарончых рубяжах. Ваеннаслужачыя выканалі інжынернае абсталяванне пазіцый, арганізавалі сістэму агню, наладзілі ўзаемадзеянне паміж разлікамі і экіпажамі.

Згодна з задумкай вучэнняў, дыверсійна-разведвальная група (ДРГ) спрабавала ўзяць штурмам умацаваны раён. Паводле слоў намесніка дзяржаўнага сакратара Савета Бяспекі Аляксандра НЕВЯРОЎСКАГА, створаная сістэма інжынерных загарод паказала сваю эфектыўнасць. «Праціўнік на подступах быў заўважаны, спрацавалі сігнальныя міны, і падраздзяленне адбіла атаку ДРГ, — удакладніў ён. — Супраць падраздзялення Узброеных Сіл у якасці ДРГ выступала спецпадраздзяленне іншага сілавога ведамства. Гэта прафесіяналы, для якіх такі ўдзел — таксама навучальны элемент».

Як падзяліўся адзін з вайскоўцаў 11-й асобнай гвардзейскай механізаванай брыгады, яны працуюць у штатным рэжыме. «Настрой баявы, працуем, — заўважыў малады чалавек. — Мы ж на пастаяннай аснове адпрацоўваем усе пытанні, заняткі рэгулярныя. А матывуе нас любоў да Радзімы».

Разнастайна і збалансавана

Пастаўленыя задачы падраздзяленні выконваюць удалечыні ад цёплых казармаў: на палігонах, у лясах, раёнах разгрупавання. Байцы не толькі абсталявалі свае пазіцыі, але і ўладкавалі побыт.

Дзяжурная рота па рэагаванні 38-й асобнай гвардзейскай дэсантна-штурмавой брыгады здзейсніла начны марш, пераадолеўшы больш за 50 кіламетраў. Заняўшы вузел супраціўлення, дэсантнікі ўладкавалі пазіцыі, сістэмы агню, сістэмы сувязі. Перад імі стаяла задача — утрымаць граніцу абароны, не дапусціць прарыў умоўнага саперніка.

Як доўга працягнецца праверка, невядома. А таму прадуктаў для палявой кухні прывозяць з запасам на пару дзён. На складзе ёсць макароны, некалькі відаў круп, тушонка. Напрыклад, на адзін з абедаў брэсцкім дэсантнікам падавалі рысавы суп, макароны з тушанай ялавічынай, гарбату з цукровым печывам. У дадатковы паёк байцоў уваходзяць сала і карамель.

«Ваеннаслужачыя на трое сутак забяспечаны сухім пайком. Але мы можам пераходзіць на гарачае харчаванне. У нас ёсць асобны склад для захоўвання прадуктаў», — расказаў старшына падраздзялення.

Кухары імкнуцца смачна накарміць саслужыўцаў, каб яны ў такое капрызнае надвор'е маглі сагрэцца гарачымі стравамі. «Гатуем з любоўю. Гэта ж нашы таварышы, браты, таму стараемся. Вельмі смачна атрымліваецца», — падкрэсліў старшына.
Спецыялісты складаюць меню на некалькі дзён, робяць рацыён разнастайным і збалансаваным. Усе калорыі — на ўліку, а ў такое надвор'е патрэбны яшчэ і дадатковыя.

У час праверкі Узброеных Сіл у кожнага ў падраздзяленні ёсць свае задачы. У кухараў найвышэйшы пілатаж павінен быць на кухні, але гэта не адзіны іх абавязак. «Заняты і іншымі заданнямі таксама», — не ўдаючыся ў падрабязнасці, адзначыў старшына падраздзялення.

«Каб людзі жылі ў спакоі»

Ваеннаслужачыя 103-й Віцебскай паветрана-дэсантнай брыгады, дзяжурнае падраздзяленне са складу сіл неадкладнага рэагавання, здзейснілі марш-кідок у раён прызначэння. Асаблівасць гэтага этапу пазапланавай праверкі боегатоўнасці звязана з месцам: задачы адпрацоўваюцца побач з паўднёвай граніцай.

«Асаблівую ўвагу звярталі на прымяненне беспілотных лятальных сістэм, — звярнуў увагу камандзір роты. — Папярэдне можна сказаць, што падраздзяленне з пастаўленай задачай справілася, увесь асабовы склад паказаў высокія прафесійныя навыкі, у тым ліку ў супрацьдзеянні беспілотным лятальным сістэмам».

Паводле слоў ваеннаслужачага, у далейшым прымяненне гэтых сістэм будзе ўключана ў праграму баявой падрыхтоўкі. «Гэты вопыт будзем укараняць, каб у далейшым удасканальваць і яшчэ больш якасна праводзіць вывучку асабовага складу, — указаў ён. — Эпізоды, якія адпрацоўваем, звязаны з рэальнымі дзеяннямі. Зыходзячы з вопыту спецыяльнай ваеннай аперацыі, мы акцэнтуем увагу на ўдарных беспілотных лятальных сістэмах, а менавіта — супрацьдзеянні ім».

Асабовы склад з пастаўленымі задачамі спраўляецца. Стралок дзяжурнага падраздзялення са складу сіл неадкладнага рэагавання абазначыў, што пераадоленне дыстанцыі ў больш як 360 кіламетраў было максімальна хуткім і камфортным, нягледзячы на лютаўскія маразы.

«Мы прызвычаіліся працаваць у любых умовах, — заўважыў ваеннаслужачы. — Матывацыя вялікая, бо гэта праверка кіраўніка нашай дзяржавы. Прыбылі сюды даволі хутка, аператыўна адпрацавалі і занялі свае пазіцыі. Таму зімовыя ўмовы не склалі перашкод. Адзенне — па сезоне, неабходнае абмундзіраванне ў нас ёсць. У першую чаргу, мы атрымліваем тут пэўны вопыт, а таксама даём нашым грамадзянам зразумець, што ніякая небяспека ім не пагражае. Мы гатовы аператыўна выехаць у любы пункт нашай краіны. Прыбудзем і зробім тое, што павінны, каб усё было добра, каб людзі жылі ў спакоі».

Паводле БелТА.