Прэмія накіравана на выяўленне і заахвочванне найлепшых маладзёжных інтэрнэт-рэсурсаў і спецыялістаў у галіне лічбавых камунікацый, а таксама папулярызацыю пазітыўнага кантэнту і дзейнасці БРСМ у інтэрнэт-прасторы. Яна стане фінальным мерапрыемствам рэспубліканскага маладзёжнага праекта «Ліга кантэнту».
Удзел у конкурсе дае магчымасць прадэманстраваць свае напрацоўкі, атрымаць экспертную ацэнку і наладзіць новыя кантакты ў прафесійным асяроддзі, адзначыў першы сакратар ЦК БРСМ Уладзімір ПАЎЛОЎСКІ.
— Гэта шанц заявіць пра сябе, атрымаць ацэнку экспертаў, трапіць у поле зроку БРСМ і партнёраў. Для многіх гэта трамплін — прызнанне ў супольнасці і новыя знаёмствы ў dіgіtal-асяроддзі.
Два блокі намінацый
Сёлета конкурс прадугледжвае два блокі — карпаратыўных і агульных намінацый.
Блок карпаратыўных намінацый прызначаны для структур БРСМ. У ім будуць адзначаць найлепшыя супольнасці ва «УКантакце», а таксама найлепшыя акаўнты ў Іnstagram, TіkTok, Telegram і Threads. У кожнай сацыяльнай сетцы вызначаць па адным пераможцы сярод пярвічных арганізацый, пярвічных арганізацый з правамі райкама, раённых і гарадскіх, абласных і Мінскага гарадскога камітэтаў, а таксама галіновых камітэтаў.
Блок агульных намінацый адкрыты для ўсіх ахвотных. У ім прадугледжаны намінацыі за найлепшы маладзёжны інтэрнэт-рэсурс для сацыяльных сетак, захаванне трэндаў, папулярызацыю дзейнасці БРСМ і персанальны стыль.
Пры ацэнцы работ журы будзе ўлічваць якасць і арыгінальнасць кантэнту, адпаведнасць абранай платформе, уцягнутасць аўдыторыі, рэгулярнасць публікацый і сістэмнасць вядзення рэсурсу. Таксама значэнне будуць мець пазітыўная павестка і адпаведнасць каштоўнасцям, якіх прытрымліваецца БРСМ. Акрамя таго, у агульных намінацыях асобную ўвагу звернуць на творчы падыход і актуальнасць кантэнту ў дачыненні да сучасных трэндаў.
Жывы кантэнт і хуткая рэакцыя
Сёння маладзёжная лічбавая прастора патрабуе не толькі цікавых ідэй, але і ўмення падаваць іх у адпаведным фармаце. Паводле слоў Уладзіміра Паўлоўскага, найбольшую цікавасць у аўдыторыі выклікае жывы, кароткі і шчыры кантэнт: відэа, Reels, сторыс, мемы, матэрыялы з-за куліс і асабістыя гісторыі. Важнымі застаюцца аператыўнасць і ўцягванне карыстальнікаў ва ўзаемадзеянне.
Сярод актуальных трэндаў у dіgіtal-камунікацыях спікер вылучыў кароткія вертыкальныя відэа, натуральнасць падачы інфармацыі і размоўны стыль, інтэрактыўныя фарматы — апытанні і чэленджы. Не менш істотныя адаптацыя матэрыялаў пад асаблівасці кожнай платформы, праца з супольнасцямі і хуткая рэакцыя на актуальныя падзеі.
Пры гэтым адназначнага лідара сярод сацыяльных сетак у беларускай моладзі няма: выбар залежыць ад інтарэсаў аўдыторыі. TіkTok і Іnstagram забяспечваюць ахоп і ўцягнутасць, Telegram вылучаецца аператыўнасцю і магчымасцямі для працы з супольнасцямі. Threads пакуль набірае абароты, але ўжо прыцягвае моладзь, якой цікавыя тэкставыя фарматы і абмеркаванні.
Ад падачы заяўкі да фіналу
Конкурс пройдзе ў некалькі этапаў: прыём і апрацоўка заявак, абласныя і Мінскі гарадскі адборачныя туры, пасля якіх адбудзецца рэспубліканскі адборачны тур.
— Канкурэнцыя традыцыйна высокая — у карпаратыўных намінацыях за перамогу змагаецца больш за 100 структур БРСМ, у агульных — актыўная моладзь з усёй краіны. Але гэта і робіць вынік каштоўным, — лічыць Уладзімір Паўлоўскі.
Часу засталося мала
Заяўкі на рэспубліканскую маладзёжную інтэрнэт-прэмію можна падаць праз «Смарт-білет БРСМ» або па спасылках, якія ёсць на сайце маладзёжнай арганізацыі. Пры запаўненні заяўкі неабходна ўважліва выбраць намінацыю і катэгорыю, праверыць спасылкі на інтэрнэт-рэсурсы, пераканацца, што яны адкрытыя і актуальныя, а таксама ўлічыць тэрміны падачы.
Прыём заявак працягнецца да 5 лістапада 2026 года. Пераможцаў запросяць на выніковае мерапрыемства, дзе іх узнагародзяць прызамі і памятнымі падарункамі.
Міхаіл ДАНІЛКОВІЧ
