У інтэрнэце завірусілася відэа, у якім жанчына паведаміла, што яе дачок на дзіцячай пляцоўцы нібыта спрабаваў выкрасці невядомы. Супрацоўнікі міліцыі правялі праверку і старанна разабраліся ў сітуацыі. Устаноўлена, што жыхар вёскі Бараўляны прыехаў у двор забраць сваю дачку, якая гуляла з сяброўкай. У прыцемках ён заўважыў падобных дзяцей і паклікаў іх. Падышоўшы бліжэй, зразумеў, што памыліўся, і накіраваўся назад да свайго аўтамабіля. 

У гэты момант маці дзяўчынак паклікала мужчыну і папярэдзіла, што здыме яго на тэлефон і размесціць у інтэрнэце. Той растлумачыў, што ўсяго толькі шукае сваё дзіця. Неўзабаве яго дачка, якая знаходзілася ў кватэры сяброўкі, выйшла з дома, і яны з’ехалі.

«Апошнім часам пачасціліся выпадкі размяшчэння ў інтэрнэце хайпавага відэакантэнту, які прыводзіць да стварэння панікі ў грамадстве і часцяком не адпавядае рэчаіснасці. Чалавек, які клапоціцца пра жыццё і здароўе сваіх блізкіх, у першую чаргу звяртаецца па дапамогу ў экстранныя службы, а не робіць на гэтым піяр у сетцы. Пры падазрэнні на ўчыненне злачынства неадкладна тэлефануйце ў міліцыю па нумары 102 або пішыце ў чат-бот „Мы заўсёды побач!“. Беларусь — спакойная краіна, дзе дзеці могуць без боязі гуляць на вуліцы. У Міністэрстве ўнутраных спраў дастаткова сіл і сродкаў, каб гэта забяспечыць», — адзначылі ў МУС.