Прэм’ер-міністр Літвы Гінтаўтас Палуцкас вырашыў сысці ў адстаўку з пасады кіраўніка ўрада і пасады старшыні Літоўскай сацыял-дэмакратычнай партыі пасля карупцыйнага скандалу. Гэта пацвердзіў Прэзідэнт Рэспублікі Гітанас Наўседа, паведамляе БелТА.
«Сённяшняя навіна заключаецца ў тым, што Гінтаўтас Палуцкас патэлефанаваў раніцай і абвясціў аб сваёй адстаўцы», — сказаў Наўседа.
Палуцкас таксама пакідае пасаду старшыні Літоўскай сацыял-дэмакратычнай партыі, якую цяпер узначаліць яго былы першы намеснік — мэр Ёнаўскага раёна Міндаўгас Сінкявічус.
Пры гэтым Наўседа адзначыў, што пакуль «нічога з фундаментальных рэчаў не мяняецца». «Літоўская сацыял-дэмакратычная партыя, якая перамагла на парламенцкіх выбарах і мае большасць у Сейме, пачне кансультацыі па фарміраванні магчымай кааліцыі», — адзначыў кіраўнік дзяржавы. Паводле яго слоў, цяпер краіне неабходная працаздольная і стабільная кааліцыя, а прэм’ер павінен упэўнена весці яе і ўрад наперад.
Лідар кіроўнай партыі дэмакратаў, спікер Сейма Саўлюс Скверняліс у сваю чаргу звярнуў увагу на тое, што з сыходам прэм’ер-міністра Гінтаўтаса Палуцкаса са сваёй пасады пагадненне аб кіроўнай кааліцыі страчвае сілу і яго давядзецца пераглядаць. Скверняліс заяўляў, што Саюз дэмакратаў «У імя Літвы» адмовіцца ад удзелу ў кіруючай кааліцыі, калі Палуцкас застанецца прэм’ерам.
Раней стала вядома, што Служба расследавання фінансавых злачынстваў правяла вобыскы ў кампаніі жонкі брата Палуцкаса — Dankora, якая атрымала еўрапейскія субсідыі і закупляла акумулятарныя сістэмы ў фірмы Garnis, часткова якая належыць самому прэм’еру. Акрамя таго, незалежныя следчыя паведамілі, што кампанія Garnis, заснаваная Палуцкасам і яго партнёрам, атрымала льготны крэдыт у 200 тыс. еўра ўжо пасля прызначэння Палуцкаса прэм’ерам. Затым з’явіліся даныя аб нявернутых крэдытах яго іншай фірмы Sagerta і некаторых сумніўных здзелках. Чарговым ударам стала інфармацыя аб тым, што кампанія Dankora, звязаная з сям’ёй Палуцкаса, атрымала еўрапейскую дапамогу, большую частку якой выдаткавала на закупкі ў яго ж кампаніі. Пасля агалоскі фірма паспяшалася адмовіцца ад субсідыі. Тым не менш Палуцкас да апошняга адпрэчваў абвінавачванні, а прэзідыум яго партыі заяўляў, што ён павінен працягваць работу да завяршэння расследаванняў.
Цяпер Палуцкас, каментуючы сваю адстаўку, заявіў, што не хоча, каб кааліцыя і ўрад ператвараліся ў закладнікаў скандалаў. Адзначаецца, што палітык прызнаў свае памылкі ў мінулым, але настойвае, што «на пасадзе прэм’ера дзейнічаў сумленна» і «не дапусціў сур’ёзных парушэнняў».
