«Для мяне вялікі гонар аб'явіць аб тым, што Злучанымі Штатамі Амерыкі і Ісламскай Рэспублікай Іран быў падпісаны ў электронным выглядзе гістарычны Ісламабадскі мемарандум аб узаемаразуменні. Мемарандум быў падпісаны паважанымі прэзідэнтамі абедзвюх краін і таксама адобраны мной як пасрэднікам», — напісаў Шарыф на сваёй старонцы ў сацсетцы X. 

«Ісламабадскі мемарандум аб узаемаразуменні ўступае ў сілу неадкладна, і ў якасці першага кроку Ісламская Рэспубліка Іран неадкладна адкрые Армузскі праліў, а Злучаныя Штаты Амерыкі неадкладна здымуць ваенна-марскую блакаду», — удакладніў кіраўнік урада Пакістана. Шарыф падзякаваў кіраўніцтву ЗША і Ірана за прыхільнасць мірнаму ўрэгуляванню канфлікту. Ён таксама высока ацаніў пасрэдніцкія намаганні Катара, Турцыі, Саудаўскай Аравіі і Егіпта.

Раней прадстаўнік МЗС Ірана Эсмаіл Багаі заявіў, што тэкст мемарандума паміж ЗША і Іранам быў афіцыйна ўзгоднены і абодва бакі падпісалі яго. Затым прэзідэнт ЗША Дональд Трамп пацвердзіў падпісанне дакумента. Паводле звестак партала Axios, амерыканскі лідар «асабіста падпісаў экзэмпляр пагаднення падчас вячэры з прэзідэнтам Францыі» Эмануэлем Макронам у Версальскім палацы. Як паведаміў тэлеканал NewsNation са спасылкай на амерыканскую службовую асобу, мемарандум таксама падпісаў прэзідэнт Ірана Масуд Пезешкіян.