У праграме MODANSE на сцэне тэатра оперы і балета Беларусі выступіць Святлана Захарава, народная артыстка Расіі, прыма-балерына Вялікага тэатра Расіі, першая і адзіная расійская этуаль тэатра La Scala (Мілан). Апошні візіт выканаўцы ў Мінск адбыўся ўвосень 2023 года. 

23 мая будуць паказаны два аднаактовыя балеты — «Як дыханне» італьянскага харэографа Маўра Біганцэці (з творамі Георга Фрыдрыха Гендэля ў музычнай аснове) і «Gabrielle Chanel»: спектакль-прысвячэнне французскай заканадаўцы мод Како Шанэль, створаны сумесна з домам Chanel для пастаноўкі MuzArts, — вынік працы кампазітара Ільі Дзямуцкага, харэографа Юрыя Посахава і рэжысёра Аляксея Франдэці. 

Між тым у праграме прымуць удзел зоркі балета Вялікага тэатра Расіі. 

• 6 і 7 чэрвеня Вялікі запрашае на прэм’еру балета Людвіга Мінкуса «Баядэрка» ў рэдакцыі галоўнага балетмайстра тэатра, заслужанага артыста Расіі Ігара Колба. Адной з асаблівасцей пастаноўкі, якая адкрые «Балетнае лета ў Вялікім», стане рэканструкцыя асобнай сцэны: яе спектакль у свой час быў пазбаўлены. Гаворка пра фінальны акт — разбурэнне храма. 

Музычным кіраўніком, дырыжорам-пастаноўшчыкам «Баядэркі» выступае народны артыст Башкартастана Арцём Макараў. Над візуальным рашэннем працуе мастак-пастаноўшчык лаўрэат рэспубліканскіх конкурсаў Любоў Сідзельнікава, якая, між іншым, натхнілася ў тым ліку кінематографам Балівуда... 

• У чэрвені ўсе творчыя калектывы тэатра едуць у Нясвіж — там з 19-га да 21-га будуць праходзіць «Вечары Вялікага тэатра Беларусі ў замку Радзівілаў». 

Адкрые фестываль канцэрт галоўнага рэжысёра тэатра Ганны Маторнай «Беларуская опера: традыцыя і сучаснасць». Тэатралізаваная праграма падрыхтавана ў рамках праекта «На скрыжаванні музычных падзей: опера — гэта модна, опера — гэта моцна!», які рэалізуецца за кошт сродкаў гранта Прэзідэнта Рэспублікі Беларусь у сферы культуры на 2026 год. У афішы форуму таксама містычны спектакль «Вілісы. Фатум», канцэрт «Золата і цень Нясвіжа: старажытная музычная фрэска» і многае іншае. 

Яўгенія ШЫЦЬКА, «ЛіМ»

Фота БелТА