Першы паказ драматычнай камедыі па творы драматурга Валянціна Краснагорава намечаны на 5 лістапада. «Гэта жаночы спектакль ва ўсіх сэнсах. У ролях — нашы выдатныя актрысы розных пакаленняў, — расказалі ў БАТД. — Гераіні збіраюцца разам пасля смерці мастака, каб падзяліць яго спадчыну. У кожнай з іх з ім былі свае ўзаемаадносіны, кожная лічыць сябе найболей дастойнай. Вельмі лёгкі спектакль, з гумарам і камічнымі сітуацыямі. Пастаноўка для таго, каб адпачыць і пасмяяцца».

Лістапад абяцае падарыць брэсцкай публіцы разнастайнасць рэпертуару. Так, 3 лістапада тэатр акунецца ў «Вечар аперэты». Канцэртная праграма прысвечана самаму лёгкаму, бліскучаму і жыццярадаснаму музычна-тэатральнаму жанру. Брастаўчан чакае сустрэча з шэдэўрамі класікі. На сцэне прагучаць арыі, дуэты і ансамблі кампазітараў Іагана Штраўса, Імрэ Кальмана, Франца Легара, Жака Афенбаха. Віртуознае вакальнае майстэрства артыстаў дапоўніцца яркімі касцюмамі і жывым тэатральным дзеяннем.

Незабыўныя ўражанні слухачы атрымаюць 29 лістапада. Сімфанічны аркестр Брэсцкага акадэмічнага тэатра драмы прадставіць літаратурна-музычную кампазіцыю «Пер Гюнт»: вядомую ва ўсім свеце гісторыю нарвежскіх кампазітара Эдварда Грыга і драматурга Генрыка Ібсена. Перад публікай паўстануць вобразы велічнай нарвежскай прыроды, казачныя персанажы нацыянальнага фальклору.

Паралельна трупа БАТД рыхтуецца да зімовых свят. У тэатры абяцаюць парадаваць навагодняй казкай «Снежная каралева» паводле твора Ханса Крысціяна Андэрсена ў інсцэніроўцы Рэнаты Насібулінай. Класічны сюжэт гісторыі пра Кая і Герду будзе захаваны, але з дапамогай сучасных пастановачных рашэнняў і спецэфектаў гледачы паглыбяцца ў дзіўны свет. Творчая група працуе над яркімі навагоднімі дэкарацыямі, сцэнічнымі эфектамі. Яшчэ адзін акцэнт — на касцюмах. Першыя паказы «Снежнай каралевы» плануюцца ў сярэдзіне снежня.