Па словах эксперта, неспрыяльныя ўмовы надвор’я вызначаюцца заканадаўча. Мясцовыя органы ўлады могуць прыняць рашэнне аб тым, што будуць абмежаваныя, альбо ўвогуле адмененыя навучальныя заняткі ў школе. «Што да агульных падыходаў, то, як правіла, заняткі адмяняюцца пры тэмпературы мінус 25 градусаў і хуткасці ветру ад 3 м/с. Улічваецца яшчэ і тое, як дзіця дабіраецца да школы. Калі яму трэба пераадолець вялізны шлях, то, вядома, трэба застацца дома», — дапоўніла загадчыца цэнтра.

Сняжана Каўрыга нагадала, што найперш менавіта бацькі нясуць адказнасць за сваіх дзяцей. Медык заклікала назіраць за станам дзіцяці ў канкрэтны дзень і вырашыць, ці гатова яно да экстрэмальных умоў надвор’я. «Трэба ўлічваць, ці ёсць у яго рэспіраторныя інфекцыі і вострыя ці хранічныя захворванні, якія могуць абвастрыцца ў халодную пару года. Варта зважаць на стан сардэчна-сасудзістай і мочавыдзяляльнай сістэм. Калі ёсць пэўныя праблемы, то дзіця абавязкова павінна застацца дома», — адзначыла яна.

Да выхаду на вуліцу неабходна грунтоўна рыхтавацца. «У першую чаргу гэта падрыхтоўка рацыёну. У холад арганізм чалавека траціць больш калорый, чым звычайна. Дзіця заўсёды павінна снедаць, а ў момант непагадзі перад наведваннем школьных заняткаў важна павялічыць калараж на 250-300 ккал. Калі звычайна сняданак складаў, напрыклад, 25% ад агульнай колькасці калорый, то яго можна павялічыць да 35%. Ежа павінна быць з вялікай колькасцю вугляводаў і тлустая. Сняданак неабходна прыняць за 30-40 хвілін да выхаду», — падкрэсліла медык.

Самы адкрыты орган — скура. Эксперт нагадвае: яе трэба падрыхтаваць мінімум за паўтары гадзіны да выхаду на мароз. Крэмы павінны быць больш шчыльнай кансістэнцыі, а для таго, каб яны лепш увабраліся, патрэбны час. 

Адзенне павінна быць шматслаёвым і ахоўным, максімальна натуральным, а абутак устойлівым, рыфленым і няслізкім, на невялікім абцасе.