Падчас рэспубліканскага суботніка на тэрыторыі Мінскай вобласці будуць праведзены работы па азеляненні, добраўпарадкаванні і прывядзенні ў належны стан аб’ектаў і тэрыторый населеных пунктаў, гісторыка-культурных каштоўнасцяў. Асаблівая ўвага будзе нададзена мемарыяльным комплексам, месцам баявой і воінскай славы, пахаванням воінаў. Так, у Маладзечанскім раёне ў в. Краснае падчас суботніка будуць выкананы работы па добраўпарадкаванні брацкай магілы савецкіх воінаў і партызан. Калектывы папрацуюць на добраўпарадкаванні тэрыторый мемарыяльнага комплексу «Дальва», урочышча «Іванаўшчына» ў Лагойскім раёне, каля брацкай магілы воінаў Савецкай Арміі і партызан у Жодзіне і помніка-мемарыяла ў аграгарадку Заполле Слуцкага раёна.

Ператварэнне закране гарадскія скверы, паркі культуры і адпачынку, прыдарожныя палосы аўтамабільных дарог рэспубліканскага значэння, прылеглыя тэрыторыі арганізацый, вытворчых прадпрыемстваў і ўстаноў. Ва ўсіх рэгіёнах вобласці будуць выкананы работы па пасадцы дрэў і дэкаратыўных кустоў, пабелцы бардзюраў, афарбоўцы малых архітэктурных формаў і цокаляў будынкаў, кантэйнерных пляцовак.

Прадпрыемствы ЖКГ вобласці, якія таксама актыўна ўключацца ў гэты дзень у агульнае добраўпарадкаванне, пастараюцца, каб суботнік стаў запамінальным святам працы. 

• Мерапрыемства «Жыві як гаспадар» для ўсёй сям’і пройдзе ў Барысаве. Гараджане змогуць на суботніку не толькі папрацаваць, але і адпачыць: забаўкамі стануць віктарыны, конкурсы і прыемныя сюрпрызы.

• Арт-суботнік «Фарбуй, саджай — нуду прыбірай» і акцыя «Раздзяляй адходы — беражы прыроду» пройдзе ў чэрвені. Будзе арганізаваны збор старой бытавой тэхнікі, адходаў шкла і паперы. У праграме таксама конкурсы і віктарыны для дзяцей, прызы і салодкія пачастункі ўдзельнікам. Пачатак у 10.00 у дзіцячым парку. 

• Акцыя «Разам за чысціню» пройдзе ў Капылі: яе ўдзельнікі змогуць прынесці карысць свайму гораду, папрацаваўшы на добраўпарадкаванні. Удзельнікаў чакаюць конкурсы з прызамі для герояў любога ўзросту, незвычайная лекцыя па ПДР і інш. Пачатак у 9.00.

• Тэматычнае сацыяльнае мерапрыемства «Даступны свет» па стварэнні тэрыторыі для людзей з абмежаванымі магчымасцямі арганізуюць у Маладзечне.

• «Прывітанне з СССР» чакае ўдзельнікаў суботніка ў Смалявічах: пад гукі музыкі з 1980-х з духмянай гарбатай з самавара Смалявіцкі водаканал прапануе ўсім ахвотным навесці парадак на водазаборы «Ліпкі». 

Дзіцячую гадзіну для дарослых спраў арганізуюць у Салігорску: тут адкрыецца прастора з інтэрактыўнымі гульнямі для дзяцей розных узростаў (шашкі, размалёўкі, гольф і інш.). 

Чакаецца, што ў Мінскай вобласці ў суботніку прымуць удзел больш за 320 тыс. чалавек. Грашовыя сродкі, заробленыя ў дзень правядзення рэспубліканскага суботніка, будуць накіраваны на стварэнне экспазіцыі Нацыянальнага гістарычнага музея Беларусі.