У Беларусі 17 ліпеня завяршыўся прыём дакументаў у ВНУ ад абітурыентаў, якія паступаюць на бюджэтныя месцы. Пры плане прыёму на бюджэт 33,1 тыс., дакументы падалі 52,7 тыс. абітурыентаў. Раней залічана 5,6 тыс. мэтавікоў і 0,4 тыс. пераможцаў універсітэцкіх алімпіяд, расказалі ў Міністэрстве адукацыі, паведамляе SB.by.
Па выніках падачы дакументаў звыш 5,1 тыс. абітурыентаў прэтэндуюць на залічэнне без уступных іспытаў (пераможцы міжнародных і рэспубліканскіх алімпіяд, уладальнікі залатых (сярэбраных) медалёў школ і дыпломаў каледжаў з адзнакай, выпускнікі Нацыянальнага дзіцячага тэхнапарку, профільных класаў і іншыя), больш за 900 — па-за конкурсам.
Высокія конкурсы (больш за 5 чал. на месца) адзначаны па спецыяльнасцях «Графічны дызайн і мультымедыядызайн», «Прыкладная фізіка», «Правазнаўства» і іншыя.
Па шэрагу спецыяльнасцяў абітурыенты падалі дакументы з сумай балаў больш за 390: «Праграмная інжынерыя», «Міжнародная эканоміка і гандаль», «Міжнародныя адносіны», «Эканамічная інфарматыка», «Прыкладная фізіка».
Запатрабавана падрыхтоўка спецыялістаў з вышэйшай адукацыяй у рэгіянальных ВНУ. Пры плане прыёму на бюджэтныя месцы 15,5 тыс. месц, дакументы падалі 20,7 тыс. абітурыентаў. Найбольшыя конкурсы на месца ў Палескім дзяржаўным універсітэце, Гродзенскім дзяржаўным універсітэце ім. Я.Купалы, Віцебскім дзяржаўным універсітэце ім. П.М.Машэрава, Гомельскім дзяржаўным універсітэце ім. Францыска Скарыны.
