Як паведамлялася раней, да трагедыі прывёў канфлікт паміж двума 17-гадовымі навучэнцамі філіяла «Гомельскі дзяржаўны дарожна-будаўнічы каледж імя Ленінскага камсамола Беларусі» ўстановы адукацыі «Рэспубліканскі інстытут прафесійнай адукацыі». Ён разгарэўся 25 сакавіка ў памяшканні майстэрні навучальнага палігона. 

«Адзін з хлопцаў пры высвятленні адносін з аднагрупнікам нанёс яму нажавыя раненні, ад якіх апошні памёр у бальніцы. Расследаванне асабліва цяжкага злачынства ажыццяўляла следчая група. Па крымінальнай справе праведзены комплекс следчых дзеянняў, у тым ліку два следчыя эксперыменты са сведкамі. Спецыялістамі ДКСЭ па пастановах следчых праведзены шэраг экспертыз, адна з якіх — стацыянарная комплексная псіхолага-псіхіятрычная экспертыза», — расказалі ва УСК.

Па высновах следства, учыненню злачынства папярэднічаў працяглы міжасобасны канфлікт. У дзень інцыдэнту фігурант прыйшоў на заняткі з кухонным нажом. Падчас нападу ён мэтанакіравана наносіў удары нажом у жыццёва важныя органы. Пры гэтым у той момант абвінавачаны не пакутаваў якім-небудзь псіхічным расстройствам, не знаходзіўся ў стане афекту і мог у поўнай меры ўсведамляць значэнне сваіх дзеянняў і кіраваць імі, дадалі ва УСК. 

Следства кваліфікавала дзеянні фігуранта па ч. 1 арт. 139 (наўмыснае супрацьпраўнае пазбаўленне жыцця іншага чалавека) КК. Крымінальная справа перададзена пракурору для вывучэння і далейшага накіравання ў суд.

Гомельскім ДСК на адрас Рэспубліканскага інстытута прафесійнай адукацыі ўнесена прадстаўленне аб прыняцці мер па ліквідацыі выяўленых недахопаў і недаглядаў у арганізацыі работы з навучэнцамі каледжа. Па выніках яго разгляду да шэрагу службовых асоб інстытута і каледжа прыняты меры дысцыплінарнага ўздзеяння.