«Мы жывём у перыяд эпахальнай тэхналагічнай рэвалюцыі. Літаральна ўчора мы ўспрымалі штучны інтэлект як эксперымент або нават гульню. А сёння яго магчымасці трансфармуюцца ў важныя элементы новай глабальнай эканомікі. 95% насельніцтва Беларусі — актыўныя карыстальнікі інтэрнэту. Такі высокі ўзровень лічбавізацыі дапамагае нам паспяхова інтэграваць элементы ШІ ў паўсядзённае жыццё. А таксама ў ахову здароўя, сельскую гаспадарку, тэхніку, якую мы вырабляем», — звярнуў увагу Уладзімір Пярцоў.
На яго думку, там, дзе прагрэс, маштабуюцца і розныя рызыкі і пагрозы — і галіна развіцця ШІ не выключэнне. «Менавіта таму Беларусь актыўна падтрымала ініцыятыву КНР па стварэнні Сусветнай арганізацыі супрацоўніцтва ў галіне штучнага інтэлекту (World Artificial Intelligence Cooperation Organization, WAICO). У гэтым годзе мы сталі адной з дзяржаў-сузаснавальніц. Лічым гэта важным крокам ва ўмацаванні міжнароднага супрацоўніцтва, змяншэнні лічбавага разрыву паміж краінамі, забеспячэнні бяспечнага і этычнага выкарыстання новых тэхналогій», — падкрэсліў першы намеснік кіраўніка Адміністрацыі Прэзідэнта.
Кітайская Народная Рэспубліка — адзін з самых вопытных ігракоў у гэтай сферы, адзначыў Уладзімір Пярцоў. «Вы набылі вялікі вопыт, даказалі, што развіццё лічбавай эканомікі і кібербяспека не супярэчаць адзін аднаму. У рамках работы WAICO мы выступаем за абмен методыкамі, тэхналагічнымі рашэннямі, прававой практыкай паміж усімі ўдзельнікамі арганізацыі. Беларусь вітае стварэнне цэнтраў супрацоўніцтва па прымяненні ШІ, якое было ініцыявана Старшынёй КНР Сі Цзіньпінам. Мы будзем рады выкарыстоўваць іх як пляцоўку для абмену вопытам, падрыхтоўкі прафесійных кадраў, сумеснай распрацоўкі стандартаў у галіне штучнага інтэлекту», — заявіў ён.
У верасні 2026 года Нацыянальная акадэмія навук Беларусі і Цзіліньскі ўніверсітэт падпісалі пагадненне аб стварэнні сумеснай лабараторыі па штучным інтэлекце і новых канцэптуальных матэрыялах і тэхналогіях, нагадаў Уладзімір Пярцоў. «Мы ўскладаем вялікія надзеі на гэта супрацоўніцтва. Упэўнены, што новая лабараторыя зможа аб’яднаць інтэлектуальныя рэсурсы дзвюх краін і надасць моцны імпульс для ўкаранення інавацый у рэальны сектар эканомікі», — падзяліўся планамі першы намеснік кіраўніка Адміністрацыі Прэзідэнта.
Беларусь гатова разам з усімі працаваць над стварэннем празрыстых і справядлівых правіл развіцця ШІ — у імя міру, стабільнасці і працвітання ўсіх народаў. «Мы гэтак жа, як і Кітай, лічым: у цэнтры любога алгарытму заўсёды павінен заставацца чалавек — яго правы, бяспека і дабрабыт. Штучны інтэлект — гэта не прагрэс дзеля прагрэсу. Новая тэхналогія мае сэнс тады, калі яна робіць больш дакладным дыягназ урача. Калі дзякуючы лічбаваму аналізу палёў паляпшае ўраджай. Калі вызваляе нас ад руціны, пакідаючы час і сілы на тое, што сапраўды важна — на развіццё, творчасць, навуковыя пошукі. Словам, на новыя здзяйсненні на карысць нашай агульнай будучыні», — рэзюмаваў Уладзімір Пярцоў.
