Паводле слоў Наталлі Пяткевіч, Адміністрацыя Прэзідэнта маніторыць сітуацыю з гарадамі-спадарожнікамі. Яна нагадала, што стварэнне гарадоў-спадарожнікаў было ініцыятывай кіраўніка дзяржавы. «Гэта выдатная і комплексная ініцыятыва, у ёй вельмі шмат аспектаў. Гэта дае магчымасць і разгрузіць буйныя гарады, і развіваць тэрыторыі. Гэта значыць, мы ідзём ушырыню. Кропкі прыцяжэння адцягваюцца ад цэнтральных гарадоў», — звярнула ўвагу першы намеснік кіраўніка Адміністрацыі Прэзідэнта.

Наталля Пяткевіч заўважыла, што ў свой час правядзенне «Дажынак» дало імпульс да росквіту малых гарадоў. Ініцыятыва аб гарадах-спадарожніках мае падобную мэту. «Ідэя аб гарадах-спадарожніках прызначана далей развіваць населеныя пункты па ўсёй краіне, забяспечваючы галоўную мэту: выраўноўванне ўмоў жыцця ў населеных пунктах, незалежна ад таго, вялікі ён ці малы і ў якім рэгіёне знаходзіцца», — сказала Наталля Пяткевіч.

Першы намеснік кіраўніка Адміністрацыі Прэзідэнта звярнула ўвагу, што ў Беларусі восем гарадоў-спадарожнікаў. Раней яна наведала Жабінку і Скідзель — гарады-спадарожнікі Брэста і Гродна адпаведна. «На самай справе недзе становіцца вельмі крыўдна, таму што разварушваемся павольна. Дзесяць гадоў прайшло, і калі б пачалі спачатку, было б зусім інакш. Але пачалі позна. Недзе ёсць аб’ектыўныя прычыны, недзе, на жаль, суб’ектыўныя. У адным з гарадоў прыводзілі прыклад, калі праектныя работы вядуцца на працягу практычна пяці гадоў. Гэта, вядома, не нармальна», — падкрэсліла Наталля Пяткевіч.

Яна растлумачыла, што маніторынг гарадоў-спадарожнікаў праводзіцца яшчэ і для таго, каб паглядзець, як развіваецца сітуацыя з імі: «Вынікі, вядома, ёсць. Вельмі карысна размаўляць са старшынямі райвыканкамаў, таму што ёсць ідэі і па карэкціроўцы заканадаўства. Ужо можна нешта прапаноўваць Прэзідэнту. Ёсць нейкія ідэі і па далейшым развіцці гарадоў».