Навінка была прадстаўлена БЕЛАЗам і яго партнёрам — кампаніяй InDev Solutions. Наведвальнікі могуць убачыць, як аператар са стэнда кіруе 90-тонным рабатызаваным самазвалам БЕЛАЗ-7558R. Сама машына ў гэты час знаходзіцца за сотні кіламетраў — на выпрабавальным палігоне «Сітніцкае» ў Брэсцкай вобласці.

Самазвал выкарыстоўвае камп’ютарны зрок і нейрасеткавыя алгарытмы, каб распазнаваць перашкоды, прагназаваць рух і самастойна прымаць рашэнні. Сістэма дыспетчарызацыі дае магчымасць аднаму спецыялісту адначасова сачыць за работай пяці аўтаномных машын.

Намеснік генеральнага канструктара па лічбавізацыі кар’ернай тэхнікі — начальнік аддзела сістэм інтэлектуальнага кіравання кар’ерам ААТ «БЕЛАЗ» — кіруючая кампанія холдынга «БЕЛАЗ-Холдынг» Дзмітрый Елісееў расказаў, што заказчыкі зацікаўлены ў тэхніцы, здольнай рухацца аўтаномна. «Нашы спажыўцы актыўна цікавяцца рабатызаванай і дыстанцыйна кіруемай тэхнікай. Мы вядзём перагаворы з шэрагам ключавых заказчыкаў, якім плануем пастаўляць самазвалы БЕЛАЗ з аўтаномным кіраваннем», — адзначыў ён.

Паводле слоў Дзмітрыя Елісеева, такія рашэнні могуць дапамагчы справіцца з недахопам вадзіцеляў, павысіць эфектыўнасць выкарыстання кар’ернай тэхнікі і забяспечыць рытмічнасць яе работы. «У аўтаномным рэжыме машына выконвае поўны цыкл задач — ад пагрузкі да разгрузкі і вяртання да месца пагрузкі. Яна будуе і рэдагуе маршруты, кантралюе сляпыя зоны і зоны бяспекі, а таксама адсочвае прысутнасць персаналу побач з тэхнікай. Такія рашэнні можна выкарыстоўваць на аддаленых кар’ерах, дзе не хапае персаналу, і на ўчастках з аўтаномным рухам машын», — дадаў Дзмітрый Елісееў.

Генеральны дырэктар ААТ «БЕЛАЗ» — кіруючая кампанія холдынга «БЕЛАЗ-Холдынг» Сяргей Лесін адзначыў, што цяпер асноўная задача — выпрабоўваць тэхналогію ў рэальных умовах. «На працягу гэтага года мы дапрацоўвалі сістэму, каб дабіцца максімальнай прадукцыйнасці і бяспекі. Наступны этап — эксплуатацыя», — сказаў ён.

Сяргей Лесін таксама паведаміў, што 1 кастрычніка тэхналогію прадэманструюць на палігоне «Сітніцкае». «Заўтра каля 50 прадстаўнікоў патэнцыяльных кліентаў наведаюць Брэсцкую вобласць і ўбачаць наш палігон, дзе працуюць традыцыйныя самазвалы. На працягу трох дзён на сустрэчах будуць дэманстраваць беспілотныя тэхналогіі і рашэнні ў галіне альтэрнатыўнай энергетыкі для кар’ернага транспарту», — заявіў генеральны дырэктар.

На стэндзе БЕЛАЗа таксама прадставілі газаматорныя, вадародныя, электрычныя і гібрыдныя самазвалы грузападымальнасцю ад 90 да 220 т, распрацоўкі для падземных горных работ. Сярод навінак — праект «Вадародны БЕЛАЗ», створаны сумесна з кампаніяй «Н2 Інжынірынг». Наведвальнікі могуць разгледзець макет гібрыднай вадароднай энергасістэмы для 220-тоннага кар’ернага самазвала і інфраструктуры для запраўкі вадародам.

II Міжнародная прамысловая выстаўка «ІНАПРАМ. Беларусь» праходзіць у Мінску з 30 верасня па 2 кастрычніка. У ёй удзельнічаюць прадстаўнікі больш як 40 краін. Агульная плошча выставачнай экспазіцыі складае 20 тыс. кв.м.