У перыяд пасяўной кампаніі аграпрамысловы комплекс знаходзіцца пад асаблівым кантролем праваахоўных органаў. У поле зроку праваахоўнікаў трапіў 22-гадовы трактарыст аднаго з сельгаспрадпрыемстваў Камянецкага раёна. Хлопец, вырашыўшы падзарабіць несумленным спосабам, на працягу некалькіх тыдняў у сакавіку гэтага года здзяйсняў сістэматычны крадзеж дызельнага паліва, зліваючы яго з даручанай яму машыны падчас працоўных выездаў. 

Выкрадзенае паліва малады чалавек захоўваў у гаспадарчай пабудове ў сваячкі, у далейшым рэалізоўваў, а атрыманыя сродкі траціў на ўласныя патрэбы. 

Усяго яму ўдалося выкрасці каля 900 л дызельнага паліва, якое належыць сельгаспрадпрыемству, работнікам якога ён з’яўляўся. У момант рэалізацыі чарговай партыі выкрадзенага дызпаліва хлопец быў затрыманы з доказамі злачынства супрацоўнікамі міліцыі.

Па дадзеным факце ў дачыненні да жыхара Камянца пракуратурай заведзена крымінальная справа па ч. 1 арт. 211 Крымінальнага кодэкса. Яму пагражае да чатырох гадоў пазбаўлення волі.

Ва УУС нагадалі, што завалоданне чужой маёмасцю з’яўляецца правапарушэннем, за якое будзе адпаведнае пакаранне. Каб пазбегнуць сумных наступстваў работнікам прадпрыемстваў, у чыё вядзенне даручаны матэрыяльныя каштоўнасці наймальніка, трэба ўстрымацца ад прысваення гэтых каштоўнасцяў. У выпадку здзяйснення такога дзейства надыходзіць пакаранне паводле арт. 211 КК.