Калі якія-небудзь сімптомы захоўваюцца больш за два тыдні, гэта падстава звярнуцца па дапамогу да спецыялістаў
«Рак можа развівацца без відавочных прыкмет, маскіруючыся пад звыклыя недамаганні. Напрыклад, такім невідавочным сімптомам можа быць сухі ці вільготны кашаль, які ўзмацняецца па начах. Яго часта прымаюць за наступства моцнай прастуды, але ён можа суправаджаць рак лёгкага. А з’яўленне крыві ў макроце падчас кашлю — вельмі трывожны сігнал, які патрабуе тэрміновай дыягностыкі», — расказаў РІА «Новости» анколаг Дзмітрый Пянзоў.
Акрамя таго, павінны насцярожыць змены ў рабоце кішэчніка. Многія людзі не надаюць ім асаблівага значэння, але такія парушэнні могуць паказваць на развіццё пухлінных працэсаў у тоўстым кішэчніку.
«Асобнай увагі патрабуюць любыя змены ў малочных залозах. Ушчыльненні ў грудзях або змяненне формы, празрыстыя або гнойныя выдзяленні з саска, „апельсінавая скарынка“ на скуры ў вобласці малочнай залозы — усё гэта можа быць праявай анкалагічных захворванняў. У такіх выпадках неабходна тэрміновая кансультацыя мамолага і анколага», — адзначыў урач.
Не заўсёды бяскрыўдныя і праблемы з боку мочавыдзяляльнай сістэмы. Яны часта звязаныя з запаленчымі захворваннямі мочавыводных шляхоў або прастаты, але могуць сігналізаваць і аб анкапрацэсе.
Сярод менш відавочных прыкмет анкалагічных захворванняў урач вылучыў устойлівую ахрыпласць голасу і боль у горле, які аддае ў вуха, — так можа выяўляцца рак гартані. А цяжкасці пры глытанні, асабліва цвёрдай ежы, могуць быць звязаны з пухлінай стрававода. У жанчын трывожным сігналам могуць быць крывяністыя выдзяленні па-за менструальным цыклам, а ў мужчын — бязбольныя ўшчыльненні ў вобласці машонкі.
Асаблівую групу рызыкі ўяўляюць радзімкі на скуры: іх рост, змяненне колеру, асіметрыя, размытыя межы. Каб не прапусціць небяспечнае новаўтварэнне, медык парэкамендаваў праходзіць дэрматаскапію.
«Калі які-небудзь сімптом не знікае на працягу доўгага часу, яго нельга ігнараваць. Толькі профільныя спецыялісты дапамогуць дакладна разабрацца ў першапрычыне недамагання», — падкрэсліў ён.
Своечасовы зварот да ўрача дае магчымасць выявіць рак на ранняй стадыі, што значна павышае эфектыўнасць лячэння, заключыў анколаг.
Сярод сімптомаў, якія могуць паказваць на анказахворванне, — кашаль, змены ў рабоце кішэчніка, ушчыльненні ў малочных залозах, праблемы з мочавыдзяляльнай сістэмай, ахрыпласць голасу, цяжкасці пры глытанні, крывяністыя выдзяленні ў жанчын, бязбольныя ўшчыльненні ў вобласці машонкі ў мужчын, а таксама змяненні радзімак на скуры.
