Чаму на мундзіялі так шмат футбалістаў гуляюць у ружовых буцах?

Многія заўзятары заўважылі адну цікавую дэталь цяперашняга чэмпіянату свету: ружовыя буцы літаральна запаланілі турнір. Практычна ў кожным матчы на полі можна ўбачыць гульцоў у яркім абутку.

Прычына ў тым, што найбуйнейшыя вытворцы экіпіроўкі — Nike, Adidas і Puma — гэтым летам зрабілі стаўку менавіта на ружовы колер. Кампаніі традыцыйна выкарыстоўваюць чэмпіянат свету як галоўную вітрыну для новых мадэляў, а большасць футбалістаў абавязаныя насіць буцы брэндаў, з якімі ў іх заключаныя кантракты, піша «Трыбуна».

У Nike тлумачаць выбар проста. Паводле слоў прадстаўніка кампаніі Адзінгі Німака, даследаванні паказалі, што спартсмены адчуваюць сябе больш упэўнена ў яркім абутку.

«Мы пастаянна чуем ад спартсменаў, асабліва калі гаворка ідзе пра важныя моманты, што яркія колеры дадаюць ім упэўненасці, таму гэта стала нашай адпраўной кропкай. Ружовы — адзін з такіх колераў».

Аднак ёсць і выключэнні. Напрыклад, Ліянэль Месі забіў свой гістарычны першы хет-трык на чэмпіянаце свету ў бела-блакітных буцах Adidas El Ultimo Tango.

А для Крышціяну Раналду Nike стварыла спецыяльныя цалкам залатыя буцы, аднак на першы матч на гэтым мундзіялі партугалец у іх не выйшаў.

Варатар зборнай Англіі Шылтан дараваў Марадону за гол рукой на ЧС-1986

Былы галкіпер зборнай Англіі Пітэр Шылтан больш не трымае крыўды на аргенцінскага нападаючага Дыега Марадону за гол, які той забіў рукой на чэмпіянаце свету 1986 года.

У чвэрцьфінале ЧС-1986 Марадона адкрыў лік у матчы з англічанамі, забіўшы ў вароты Шылтана рукой. Еўрапейская зборная прайграла (1:2), а Аргенціна дайшла да фіналу і перамагла на турніры.

«Прайшло 40 гадоў з тых падзей. Нядаўна я сустракаўся з некаторымі аргенцінскімі футбалістамі падчас здымак дакументальнага фільма, яны вельмі добра паставіліся да мяне. І я думаю, што, мусіць, прыйшоў час пакласці канец маім крыўдам. Футбол — гэта выдатны від спорту, ён аб’ядноўвае нацыі і людзей», — прыводзіць словы Шылтана выданне The Sun.

Суперкамп’ютар Opta назваў зборную Аргенціны новым фаварытам чэмпіянату свету — 2026

Суперкамп’ютар Opta пасля двух тураў групавога турніру чэмпіянату свету-2026 вызначыў новага фаварыта на перамогу ў турніры.

На першае месца ў спісе галоўных прэтэндэнтаў на тытул выйшла зборная Аргенціны, верагоднасць перамогі якой праграма на сёння ацэньвае ў 15,46 %. На другім радку размяшчаецца Францыя (15,06 %), на трэцім — Іспанія (12,48 %).

У топ-6 фаварытаў таксама ўваходзяць зборныя Англіі (9,48 %), Партугаліі (6,71 %) і Германіі (6,60 %).

Перад стартам ЧС-2026 суперкамп’ютар Opta лічыў фаварытам Іспанію, а пасля першага туру назваў галоўным прэтэндэнтам на трафей Францыю.

Калдун з Ганы заявіў аб зняцці праклёну з нападаючага зборнай Англіі Кейна

Шаман Нана Кваку Бонсам заявіў, што зняў з нападаючага Хары Кейна праклён пасля матчу Англія — Гана (0:0) на групавым этапе чэмпіянату свету.

Незадоўга да гульні вядзьмак заявіў, што спыніць 32-гадовага форварда накладаннем на яго чараўніцтва. І сапраўды, у адным з момантаў нападаючы не змог пераправіць мяч у вароты ганцаў з некалькіх метраў.

«Я самы магутны спірытуаліст у свеце! Я духоўна скаваў Хары Кейна, а зараз вызваляю яго, каб ён змог забіць у наступным матчы зборнай Англіі», — заявіў Нана Кваку Бонсам пасля гэтай гульні.

Бонсам атрымаў вядомасць падчас чэмпіянату свету 2014 года, калі сцвярджаў, што датычны да траўмы партугальскага форварда Крышціяну Раналду перад сустрэчай са зборнай Ганы.

Прэзідэнт ФІФА Інфанціна назваў ЧС-2026 самай паспяховай падзеяй у гісторыі

Прэзідэнт Міжнароднай федэрацыі футбола (ФІФА) Джані Інфанціна выказаўся аб поспеху чэмпіянату свету 2026 года.

Па даных арганізатараў, запаўняльнасць стадыёнаў пасля 44 матчаў групавога этапу ЧС у сярэднім складае 99,6 %.

«Гэта неверагодна. Маштабней за ўсё, што калі-небудзь бачыў свет, — не проста футбольная падзея, а падзея ў любым сэнсе гэтага слова. Гэта самая паспяховая падзея ў гісторыі. Стадыёны поўныя, гарады поўныя, атмасфера цудоўная», — прыводзіць словы Інфанціна афіцыйны сайт ФІФА.

Сястра Раналду: «Я бачу старога на мыліцах, які цягне на спіне шмат дынь»

Сястра форварда зборнай Партугаліі Крышціяну Раналду Ліліяна Каця Авейру адрэагавала на першы гол брата на чэмпіянаце свету — 2026.

«Пачакайце, я скажу вам сёе-тое. Я тут бачу старога на мыліцах, які, сагнуўшыся, цягне на спіне шмат дынь», — напісала Авейру пасля першага гола 41-гадовага партугальца ў матчы супраць Узбекістана (5:0).

Партугалія на гэты момант набрала 4 ачкі і ўзначаліла групу K. У заключным туры групавога турніру ЧС-2026 партугальцы згуляюць супраць Калумбіі 28 чэрвеня.