У пункце пропуску «Новая Гута» ў Гомельскай вобласці адбыўся абмен паводле формулы 261 на 24. Большую колькасць перадаў расійскі бок украінскаму.

Беларусь працягвае гуманітарную місію, забяспечваючы бяспечныя калідоры і пляцоўкі для арганізацыі і правядзення абменаў ваеннапалоннымі, грамадзянскімі асобамі, целамі загінулых вайскоўцаў дзвюх краін.

Суправаджае гуманітарную місію рэгіянальная дэлегацыя Міжнароднага камітэта Чырвонага Крыжа ў Расійскай Федэрацыі і ў Рэспубліцы Беларусь.

Як падкрэсліў намеснік кіраўніка рэгіянальнай дэлегацыі па пытаннях аператыўнай дзейнасці Міжнароднага камітэта Чырвонага Крыжа Асэм Элесаві, арганізацыя падтрымлівае гуманітарныя мерапрыемствы і аперацыі паміж расійскім і ўкраінскім бакамі для вяртання цел загінулых вайскоўцаў. У асноўным гаворка ідзе пра тэхнічны бок пытання, у тым ліку правядзенне гуманітарных судова-медыцынскіх экспертыз у выпадку неабходнасці. «Усё ўзгоднена паміж краінамі ў двухбаковым парадку. Такія абмены вельмі важныя. Яны дазваляюць прадухіліць сітуацыі, калі асоба загінулых салдат не ідэнтыфікаваная і целы не вернутыя дадому. Важна, што родныя і блізкія загінулых маюць магчымасць развітацца з імі ў адпаведнасці з традыцыямі», — акцэнтаваў ён.

За апошнія гады на тэрыторыі Беларусі праведзена больш за 70 працэдур абмену паміж Расіяй і Украінай.