Віцэ-прэм’ер Расіі Дзмітрый Чарнышэнка наведаў Нацыянальную акадэмію навук Беларусі, паўдзельнічаў у семінары, прысвечаным Міжнароднаму фарсайту ў сферы штучнага інтэлекту, а таксама абмеркаваў супрацоўніцтва з Беларуссю ў сферы ШІ.

Ён падзякаваў вучоным за праведзеную работу. «Выконваючы задачы па даследаванні штучнага інтэлекту, мы разам з нашымі вучонымі, міжнароднымі экспертамі вызначылі 10 кірункаў фундаментальных даследаванняў. Яны павінны прадвызначыць будучыню. Таксама яны ляглі ў аснову міжнароднага фарсайту, — сказаў ён. — Для пачатку нам трэба расставіць прыярытэты паміж гэтымі фундаментальнымі кірункамі, каб вылучыць стратэгічна важныя з іх менавіта для міжнароднага супрацоўніцтва. Пастараемся вызначыць асноўныя задачы ўнутры гэтых кірункаў: з чаго варта пачаць, каб выбудаваць правільны навуковы парадак дня. Структура ўсіх гэтых кірункаў — не статычная, яе трэба актуалізаваць, абнаўляць».

«Усе даклады мы збярэм і дзякуючы створанай у Расіі сетцы даследчых цэнтраў у сферы штучнага інтэлекту зможам падабраць партнёраў, каб працягваць працаваць сумесна. Усе гэтыя цэнтры атрымліваюць дзяржаўную падтрымку. І зразумела, што ўсё, што будзе вынайдзена, атрымае практычнае прымяненне. Упэўнены, што разам з вамі мы зможам зрабіць новыя адкрыцці. У нас назапашаны вялікі вопыт укаранення вынаходак. Запрашаю вас наведаць нашы даследчыя цэнтры і пазнаёміцца з іх вопытам у галіне штучнага інтэлекту», — дадаў Дзмітрый Чарнышэнка.

В. а. дырэктара расійскага Стратэгічнага агенцтва падтрымкі і фарміравання ШІ-распрацовак Кірыл Землянухін адзначыў, што ў ходзе абмеркавання падчас фарсайт-сесіі і ў ходзе рабочых дамоўленасцяў намеціліся некалькі магчымых кірункаў супрацоўніцтва. «Мы вельмі шмат даведаліся, паглядзелі на беларускі бок. Пачулі таксама пра кірункі магчымага навуковага супрацоўніцтва паміж нашымі краінамі і арганізацыямі. Пастараемся іх дзесьці запусціць, а дзесьці рэанімаваць, пазнаёміць людзей, каб структураваць новыя сумесныя праекты, — сказаў ён. — З таго, што мы сёння абмяркоўвалі, расійскі бок зацікаўлены ў праектах аб выкарыстанні ШІ ў хіміі, медыцыне, а канкрэтна анкалогіі. Паспрабуем таксама вырашыць праблему даступнасці вылічальных магутнасцяў для беларускіх арганізацый, якія займаюцца даследаваннямі».